Deva Katta: టాలీవుడ్ ఇండస్ట్రీలో ఒక క్రేజీ రూమర్ గత కొన్ని రోజులుగా జోరుగా ప్రచారంలో ఉంది. ఒక భారీ బడ్జెట్ సినిమాకు సంబంధించి, ఒక ప్రముఖ రైటర్ కమ్ డైరెక్టర్ ఒక ముఖ్యమైన సీన్ను డైరెక్ట్ చేయబోతున్నారనేది ఆ వార్త సారాంశం. ఆ బిగ్ ప్రాజెక్ట్కు మాటలు అందిస్తున్న సదరు దర్శకుడు, ఇప్పుడు ఏకంగా కెమెరా వెనుక నిలబడి ఒక కీలక భాగాన్ని తెరకెక్కించబోతున్నారని సోషల్ మీడియాలో పెద్ద ఎత్తున చర్చ సాగింది. దీంతో అందరి దృష్టి ప్రముఖ దర్శకుడు దేవ కట్టా వైపు మళ్లింది. ఎందుకంటే ప్రస్తుతం ఆయన వారణాసి సినిమాతో పాటు ఎన్టీఆర్ హీరోగా నటిస్తున్న డ్రాగన్ సినిమాకి కూడా డైలాగ్స్ అందిస్తున్నారు. ఈ క్రమంలోనే ఆయన డ్రాగన్ సినిమాలో ఒక సీన్ డైరెక్ట్ చేస్తున్నారని చర్చ జరిగింది.
అయితే, ఈ పుకార్లపై దర్శకుడు దేవ కట్టా గురువారం నాడు సోషల్ మీడియా వేదికగా స్పందిస్తూ గట్టి క్లారిటీ ఇచ్చారు. కేవలం క్లిక్స్ కోసం, వ్యూస్ కోసం కొందరు పనిగట్టుకుని ఇలాంటి తప్పుడు ప్రచారాలు చేస్తున్నారని ఆయన మండిపడ్డారు. దేవ కట్టా తన ట్వీట్లో.. ప్రస్తుతం జరుగుతున్న ప్రచారంలో ఎలాంటి నిజం లేదని స్పష్టం చేశారు. “నేను వేరే ఏ సినిమాకు సంబంధించి ఒక్క షాట్ కూడా డైరెక్ట్ చేయడం లేదు” అని ఆయన కుండబద్దలు కొట్టారు. ఇలాంటి రూమర్స్ కేవలం వెబ్సైట్ క్లిక్స్ కోసం క్రియేట్ చేసినవని, ఇవి చాలా చౌకబారు ప్రచారాలని కొట్టిపారేశారు. ప్రస్తుతం తాను చేస్తున్న పనుల గురించి చెబుతూ, తన తదుపరి సినిమా స్క్రిప్ట్ వర్క్ అండ్ డెవలప్మెంట్లో బిజీగా ఉన్నట్లు దేవ కట్టా వెల్లడించారు. తన కెరీర్లోనే అత్యంత ప్రతిష్టాత్మకమైన, భారీ సినిమా కోసం రాత్రి పగలు కష్టపడుతున్నట్లు పేర్కొన్నారు. ఈ ప్రాజెక్ట్పై తనకు ఎంతో నమ్మకం, ఉత్సాహం ఉన్నాయని.. సరైన సమయం వచ్చినప్పుడు అన్ని వివరాలను అధికారికంగా ప్రకటిస్తానని తెలిపారు. ఇక తాజా క్లారిటీతో దేవ కట్టా వేరే సినిమాలకు ఘోస్ట్ డైరెక్షన్ చేస్తున్నారనే వార్తలకు పూర్తిగా చెక్ పడింది. ఆయన ఫోకస్ అంతా ఇప్పుడు తన నెక్స్ట్ సిల్వర్ స్క్రీన్ వండర్ పైనే ఉందని స్పష్టమైంది.