Bats Theft: నా బ్యాట్లు దొబ్బేశారు.. టీమిండియా ప్లేయర్ ఆవేదన.!

Deepak Chahar Bats Theft: భారత క్రికెట్ జట్టు ఫాస్ట్ బౌలర్ దీపక్ చాహర్ ప్రస్తుతం టీమిండియాకు దూరంగా ఉన్నారు. అయితే తాజాగా ఆయనకు సంబంధించిన ఓ వీడియో సోషల్ మీడియాలో వైరల్‌గా మారింది. ప్రాక్టీస్ సమయంలో గ్రౌండ్ నుంచి తనకు చెందిన మూడు ఖరీదైన క్రికెట్ బ్యాట్లు చోరీకి గురయ్యాయని దీపక్ చాహర్ చెప్పుకొచ్చాడు.

సోషల్ మీడియాలో దీపక్ చాహర్ షేర్ చేసిన వీడియోలో ఈ ఘటనపై తన అసంతృప్తిని చాలా చమత్కారంగా వ్యక్తం చేసాడు. తన మూడు బ్యాట్లు గ్రౌండ్ లో చోరీకి గురయ్యాయని తెలిపారు. ఆ మూడు బ్యాట్ల విలువ సుమారు రూ.1.5 లక్షలు ఉంటుందని చెప్పుకొచ్చారు. చోరీ చేసిన వ్యక్తికి ఆ బ్యాట్ల విలువ ఎంత ఉంటుందో తెలియకపోవచ్చని.. వాటిని అమ్మడానికి ప్రయత్నించవచ్చని లేదా టెన్నిస్ బాల్‌తో ఆడేందుకు ఉపయోగించవచ్చని చమత్కరించాడు.

అలాగే బ్యాట్లు చోరీ చేసిన వ్యక్తిని ఉద్దేశిస్తూ.. దీపక్ చాహర్ సరదాగా స్పందించారు. తన వద్ద డబ్బులు కావాలంటే నేరుగా అడిగితే ఇచ్చేవాడినని, కానీ ఇలా బ్యాట్లు చోరీ చేయాల్సిన అవసరం ఏముందని అన్నారు. ఈ ఘటనపై ఫిర్యాదు చేసేందుకు తనకు కొన్ని మార్గాలు మాత్రమే ఉన్నాయని కూడా ఆయన అన్నారు. బ్యాట్లు తిరిగి దొరకకపోతే పోలీసులను ఆశ్రయిస్తానని.. అలాగే ఉత్తరప్రదేశ్ ముఖ్యమంత్రి యోగి ఆదిత్యనాథ్ లేదా ప్రధాని నరేంద్ర మోదీని సంప్రదిస్తానని సరదాగా వ్యాఖ్యానించాడు. చివరగా దేవుడిని ప్రార్థించి, బ్యాట్లు తీసుకెళ్లిన వ్యక్తికి మంచి బుద్ధి వచ్చేలా కోరుతున్న అంటూ మాట్లాడాడు.

దీపక్ చాహర్ చాలాకాలంగా భారత జట్టుకు దూరంగా ఉంటున్నారు. ఇప్పటివరకు భారత్ తరఫున 13 వన్డేల్లో 16 వికెట్లు, 25 టీ20 అంతర్జాతీయ మ్యాచ్‌ల్లో 31 వికెట్లు పడగొట్టారు. ఆయన చివరిసారిగా 2022 డిసెంబర్‌లో వన్డే మ్యాచ్, 2023 డిసెంబర్‌లో టీ20 అంతర్జాతీయ మ్యాచ్ ఆడారు. ఐపీఎల్‌లో దీపక్ చాహర్ గత సీజన్‌లో ముంబై ఇండియన్స్ తరఫున ఆడారు. ఆ జట్టు తరఫున 8 మ్యాచ్‌లు ఆడి 8 వికెట్లు తీశారు. అంతకుముందు ఆయన చాలా కాలం చెన్నై సూపర్ కింగ్స్‌లో కీలక ఆటగాడిగా కొనసాగారు. అయితే తన కెరీర్‌లో ప్రదర్శనతో పాటు తరచూ ఎదురైన గాయాల కారణంగానూ దీపక్ చాహర్ ఇబ్బందులు ఎదురుకుంటున్నారు.

View this post on Instagram

A post shared by Deepak Chaahar (@deepak_chahar9)