Cyclone Arnab Landfall: తీరం దాటిన అర్నబ్‌ తుఫాన్‌.. మరో 6–7 గంటలు కీలకం!

Cyclone Arnab Landfall Complete: అర్నబ్‌ తుఫాన్‌ ఆంధ్రప్రదేశ్‌ తీరాన్ని దాటింది. యానాం–నరసాపురం మధ్య, కోనసీమ ప్రాంతానికి సమీపంలో తుఫాన్‌ తీరం దాటినట్లు వాతావరణ శాఖ అధికారులు వెల్లడించారు. యానాంకు నైరుతి దిశలో, నరసాపురానికి దగ్గరగా తీరాన్ని దాటిన అర్నబ్‌ తుఫాన్‌ పూర్తిగా భూమిపైకి చేరింది. ఈ క్రమంలో అతి తీవ్ర తుఫాన్‌ నుంచి తీవ్ర తుఫాన్‌గా బలహీనపడింది. తుఫాన్‌ తీరం దాటినప్పటికీ దాని ప్రభావం పూర్తిగా తగ్గలేదని అధికారులు పేర్కొన్నారు. రానున్న ఆరు నుంచి ఏడు గంటలు కీలకమని, తుఫాన్‌ ప్రభావిత ప్రాంతాల్లో ప్రజలు అప్రమత్తంగా ఉండాలని హెచ్చరిస్తున్నారు. తుఫాన్‌ కదలికలు, వాతావరణ పరిస్థితులను వాతావరణ శాఖ అధికారులు నిరంతరం పర్యవేక్షిస్తున్నారు. తీరం దాటిన నేపథ్యంలో ఉభయ గోదావరి జిల్లాల్లో భారీ వర్షాలు కురవనున్నాయి.

అర్నబ్‌ తుఫాన్‌ ప్రభావంతో కోస్తాంధ్రలో భారీ వర్షాలు కొనసాగనున్నాయి. ముఖ్యంగా తీరప్రాంతాలు, కోనసీమ, గోదావరి జిల్లాల్లో ప్రజలు అప్రమత్తంగా ఉండాలని వాతావరణ శాఖ అధికారులు సూచిస్తున్నారు. ఈరోజు సాయంత్రం వరకు భారీ వర్షాలు కురిసే అవకాశం ఉండటంతో లోతట్టు ప్రాంతాల ప్రజలు జాగ్రత్తగా ఉండాలి. బలమైన ఈదురుగాలులు వీచే సమయంలో చెట్ల కింద, విద్యుత్‌ స్తంభాల సమీపంలో ఉండకూడదని, అత్యవసరమైతే తప్ప బయటకు వెళ్లవద్దని అధికారులు సూచిస్తున్నారు. తుఫాన్‌ ప్రభావం పూర్తిగా తగ్గేవరకు ప్రజలు అధికారుల సూచనలు పాటించాలని, సహాయక బృందాలు అందించే సమాచారాన్ని గమనించాలని అధికారులు విజ్ఞప్తి చేస్తున్నారు.