Cyclone Arnab: ఉప్పాడ తీరంలో రాకాసి అలల బీభత్సం.. 30 ఇళ్లు నేలమట్టం, కాకినాడ బీచ్‌ రోడ్డు ధ్వంసం!

Cyclone Arnab Effect at Uppada: అర్నబ్‌ తుఫాన్‌ ప్రభావంతో కాకినాడ జిల్లాలోని ఉప్పాడ సముద్రతీరం అతలాకుతలమైంది. తీరప్రాంత గ్రామాలపై రాకాసి అలలు విరుచుకుపడటంతో పలుచోట్ల ఇళ్లలోకి సముద్రపు నీరు చొచ్చుకొచ్చింది. అలల ఉద్ధృతికి సుమారు 30 ఇళ్లు నేలమట్టమయ్యాయి. మరోవైపు బలమైన ఈదురుగాలులకు ఇళ్ల పైకప్పులు ఎగిరిపోయాయి. సముద్రపు అలల ధాటికి రక్షణ గోడలు ధ్వంసం కాగా.. ఉప్పాడ–కాకినాడ బీచ్‌ రోడ్డు తీవ్రంగా దెబ్బతింది. దీంతో అధికారులు రాకపోకలను నిలిపివేసి సహాయక చర్యలను వేగవంతం చేశారు.

అర్నబ్‌ తుఫాన్‌ ప్రభావంతో ఉప్పాడ సముద్రతీరంలో అలలు ఉగ్రరూపం దాల్చాయి. సుబ్బంపేట, ఉప్పాడ, సురాడపేట, జగ్గరాజుపేట, పల్లిపేట, రంగంపేట, మాయపట్నం తదితర తీరప్రాంత గ్రామాల్లో సముద్రపు అలలు ఇళ్ల వరకు దూసుకొచ్చాయి. పలుచోట్ల ఇళ్లలోకి నీరు చేరడంతో స్థానికులు తీవ్ర ఇబ్బందులు ఎదుర్కొన్నారు. అలల తీవ్రతకు సుమారు 30 ఇళ్లు నేలమట్టమయ్యాయి. భారీ ఈదురుగాలుల కారణంగా కొన్ని ఇళ్ల పైకప్పులు కూడా ఎగిరిపోయాయి. సుబ్బంపేట సమీపంలో సముద్రపు అలలు భారీగా ఎగసిపడటంతో తీరాన్ని రక్షించేందుకు ఏర్పాటు చేసిన రక్షణ గోడ పూర్తిగా ధ్వంసమైంది. రక్షణ కోసం వేసిన బండరాళ్లను సైతం అలలు చెల్లాచెదురు చేశాయి. దీంతో తీరప్రాంత గ్రామాలకు సముద్రపు అలల ముప్పు మరింత పెరిగింది. తీరప్రాంతంలో పరిస్థితిని అధికారులు పరిశీలిస్తూ అవసరమైన చర్యలు చేపడుతున్నారు.

సముద్రపు అలల ఉద్ధృతికి ఉప్పాడ–కాకినాడ బీచ్‌ రోడ్డు తీవ్రంగా దెబ్బతింది. సుబ్బంపేట వద్ద రహదారి కోతకు గురై భారీ గుంత ఏర్పడింది. మరికొన్ని చోట్ల రోడ్డుపై తారు పొరలు పెచ్చులూడిపోయాయి. రహదారి దెబ్బతినడంతో వాహనాల రాకపోకలను నిలిపివేశారు. దీంతో ఈ మార్గంలో ప్రయాణించే ప్రజలకు ఇబ్బందులు ఎదురవుతున్నాయి. తుఫాన్‌ ప్రభావంతో నష్టపోయిన తీరప్రాంత గ్రామాల్లో అధికారులు సహాయక చర్యలను వేగవంతం చేశారు. దెబ్బతిన్న ఇళ్లు, రక్షణ గోడలు, రహదారుల పరిస్థితిని పరిశీలిస్తున్నారు. సముద్రపు అలలు ఉధృతంగా ఎగసిపడుతున్న నేపథ్యంలో ప్రజలు తీరప్రాంతాలకు వెళ్లవద్దని, అప్రమత్తంగా ఉండాలని సూచిస్తున్నారు. దెబ్బతిన్న రహదారిపై రాకపోకలు పునరుద్ధరించే ముందు పరిస్థితిని పూర్తిస్థాయిలో పరిశీలించనున్నారు.