Vaibhav Sooryavanshi: హెల్మెట్ పగిలేలా బంతి విసురుతా… వైభవ్ సూర్యవంశీకి షాకింగ్ ఛాలెంజ్..

భారత యువ క్రికెట్ సంచలనం వైభవ్ సూర్యవంశీపై ఆస్ట్రేలియా మాజీ వేగవంతమైన బౌలర్ బ్రెట్ లీ ప్రశంసల వర్షం కురిపించారు. ఐపీఎల్‌లో జస్ప్రీత్ బుమ్రా, జోష్ హేజిల్‌వుడ్ వంటి అగ్రశ్రేణి బౌలర్లను సైతం ఎదుర్కొని సిక్సర్లతో విరుచుకుపడిన సూర్యవంశీ, తన అద్భుతమైన హిట్టింగ్ నైపుణ్యాలతో అందరి దృష్టినీ ఆకర్షించారు. ఇటీవల ఇంగ్లాండ్ పర్యటనలో అంతర్జాతీయ అరంగేట్రం చేసిన సమయంలో షార్ట్ పిచ్ బంతులను ఎదుర్కోవడంలో కాస్త తడబడినప్పటికీ, ఆ తర్వాత జింబాబ్వే పర్యటనలో పుంజుకుని మూడు మ్యాచుల్లో 151 పరుగులు చేసి ‘ప్లేయర్ ఆఫ్ ది సిరీస్’గా నిలిచారు.

ఈ క్రమంలో సూర్యవంశీ ఆటతీరుపై మాట్లాడిన బ్రెట్ లీ, ఒకవేళ తాను అతనికి బౌలింగ్ చేయాల్సి వస్తే ఎలాంటి వ్యూహం ఉపయోగిస్తానో వివరించారు. బ్యాటర్లు షార్ట్ పిచ్ బంతులను బౌండరీకి తరలించే క్రమంలో సవాలును స్వీకరించడం తనకు ఇష్టమని చెబుతూ, సూర్యవంశీకి వేగవంతమైన షార్ట్ పిచ్ బంతిని, హెల్మెట్ ఎత్తులో విసిరి అతని సామర్థ్యాన్ని పరీక్షించేవాడినని అన్నారు. ఒకవేళ ఆ బంతికి సూర్యవంశీ సిక్స్ కొట్టినప్పటికీ, వెనకడుగు వేయకుండా మళ్లీ అదే తరహా బంతిని విసరడానికి తాను అస్సలు సంకోచించనని పేర్కొన్నారు.

సూర్యవంశీ వయస్సుపై వస్తున్న పలు వివాదాలు లేదా చర్చల గురించి బ్రెట్ లీ స్పందిస్తూ, అతని వయస్సు 15 ఏళ్లా లేక 17-18 ఏళ్లా అనే దానితో సంబంధం లేదని తేల్చి చెప్పారు. చిన్న వయసులోనే అతను చూపుతున్న బ్యాటింగ్ ప్రతిభ అసాధారణమైనదని, భారత క్రికెట్‌కు లభించిన ఒక గొప్ప ఆవిష్కరణ అని ప్రశంసించారు. వయసు గురించి వచ్చే మాటలను పట్టించుకోకుండా ఆటపైనే దృష్టి పెడితే, రాబోయే రోజుల్లో సూర్యవంశీ అంతర్జాతీయ స్థాయిలో మరెన్నో గొప్ప విజయాలు సాధిస్తాడని బ్రెట్ లీ ఆశాభావం వ్యక్తం చేశారు.