BCCI: జింబాబ్వేపై గెలిచినా తగ్గని అసంతృప్తి.. గంభీర్ సపోర్ట్ స్టాఫ్ భవితవ్యంపై బీసీసీఐ కీలక రివ్యూ!

BCCI: భారత క్రికెట్ జట్టు వరుస వైఫల్యాలపై సమీక్ష నిర్వహించేందుకు బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (BCCI) వచ్చే నెల ఆరంభంలో సమగ్ర సమావేశాన్ని ఏర్పాటు చేయనుంది. నూతన కెప్టెన్ శ్రేయస్ అయ్యర్ సారథ్యంలో టీమిండియా ఇటీవల ఐర్లాండ్‌పై 0-2తో, ఇంగ్లాండ్‌పై 0-4తో ఘోర ఓటములను చవిచూసింది. ఆ తర్వాత జింబాబ్వేపై విజయం సాధించి సిరీస్‌ను కైవసం చేసుకున్నప్పటికీ.. ఐర్లాండ్, ఇంగ్లాండ్ పర్యటనల్లో జట్టు ప్రదర్శనపై బీసీసీఐ తీవ్ర అసంతృప్తితో ఉంది. ఆగస్టు నెలలో జరిగే ఈ సమీక్షా సమావేశంలో హెడ్ కోచ్ గౌతమ్ గంభీర్ నేతృత్వంలోని సపోర్ట్ స్టాఫ్‌కు చెందిన కొందరు సభ్యుల భవిష్యత్తుపై కూడా నిర్ణయం తీసుకోనున్నట్లు తెలుస్తోంది.

ఈ పర్యటనల వైఫల్యాలపై బీసీసీఐ కార్యదర్శి దేవజిత్ సైకియా స్పందిస్తూ.. ఆందోళన చెందాల్సిన పనిలేదని, ఇది కేవలం జట్టుకు వచ్చిన ఒక చెడు కాలం (bad phase) మాత్రమేనని పేర్కొన్నారు. అంతర్జాతీయ క్రికెట్‌లో ఇలాంటి హెచ్చుతగ్గులు సహజమేనని, అయితే జట్టు మైదానంలో చూపిన ప్రదర్శన, తీసుకోవాల్సిన దిద్దుబాటు చర్యలపైనే ఈ సమీక్షా సమావేశం ప్రధానంగా దృష్టి సారిస్తుందని ఆయన తెలిపారు. మరోవైపు, ఈ ఓటములకు బాధ్యులను చేస్తూ కఠిన నిర్ణయాలు లేదా తీవ్రమైన చర్యలు తీసుకోవద్దని దిగ్గజ క్రికెటర్ సునీల్ గవాస్కర్ బీసీసీఐని హెచ్చరించారు. కేవలం నాలుగు నెలల క్రితమే భారత్ ప్రపంచ ఛాంపియన్‌గా నిలిచిందని, అలాంటప్పుడు ఆతురుతలో నిర్ణయాలు తీసుకోవడం సరికాదని ఆయన అభిప్రాయపడ్డారు. ఐపీఎల్‌లోని ఫ్లాట్ పిచ్‌లపై ఆడి భారత బ్యాటర్లు పక్కదారి పట్టారనే వ్యాఖ్యలపై స్పందిస్తూ.. సమస్య పిచ్‌లలో లేదు, మన ఆటగాళ్ల టెక్నిక్‌లో ఉందన్నారు. ముఖ్యంగా షార్ట్ బాల్స్‌ ఎదుర్కొనే సమయంలో బ్యాటర్లు ఫ్రంట్ ఫుట్‌పైనే ఉండిపోయి బ్యాక్ ఫుట్‌పైకి వెళ్లలేకపోవడం వల్ల సాంకేతికంగా విఫలమవుతున్నారని గవాస్కర్ విశ్లేషించారు.