IMD Alert: కోనసీమకు మరో ముప్పు.. అర్నబ్ వెనుకే మరో వాయుగుండం..

బంగాళాఖాతంలో వరుసగా ఏర్పడుతున్న తుఫానులు, అల్పపీడనాలు కోనసీమ పరిసర ప్రాంత ప్రజలను తీవ్ర భయాందోళనలకు గురిచేస్తున్నాయి. ఇప్పటికే ‘అర్నబ్’ ప్రభావంతో పలు ప్రాంతాలు తేరుకోకముందే, మరో కొత్త వాయుగుండం తీరం వైపు దూసుకొస్తుండటం ఈ ప్రాంతానికి పెను ముప్పుగా పరిణమించే అవకాశం ఉంది. భారత వాతావరణ శాఖ వెల్లడించిన వివరాల ప్రకారం.. ప్రస్తుతం దక్షిణ అండమాన్ సముద్ర ప్రాంతంలో ఒక అల్పపీడనం వేగంగా బలపడుతోంది. ఇది రాబోయే కొద్ది గంటల్లో తీవ్ర అల్పపీడనంగా మారి, అండమాన్-నికోబార్ దీవుల చుట్టూ కేంద్రీకృతమయ్యే అవకాశం ఉంది. ఈ వ్యవస్థ పశ్చిమ-వాయువ్య దిశగా పయనిస్తూ, అక్టోబర్ 30వ తేదీ నాటికి ఆగ్నేయ బంగాళాఖాతం పరిసరాల్లో వాయుగుండంగా మారనుందని అధికారులు అంచనా వేస్తున్నారు.

ప్రస్తుతం తీవ్ర కలకలం సృష్టించిన ‘అర్నబ్’ తుఫాను ఏ మార్గంలో అయితే ప్రయాణించి తీరాన్ని దాటిందో, సరిగ్గా అదే బాటలో ఈ కొత్త వాయుగుండం కూడా ప్రయాణించే అవకాశం ఉందని హెచ్చరికలు జారీ అయ్యాయి. ఒకవేళ ఇదే నిజమైతే, ఇప్పటికే వరదలు, ఈదురుగాలుల దెబ్బకు కోలుకోలేని స్థితిలో ఉన్న గోదావరి జిల్లాలకు, ముఖ్యంగా తీరప్రాంతమైన కోనసీమకు భారీ స్థాయిలో నష్టం వాటిల్లే ప్రమాదం ఉంది.

ఈ తీవ్ర వాయుగుండం ప్రభావంతో కోనసీమ వ్యాప్తంగా ఈదురుగాలులతో కూడిన భారీ నుంచి అత్యంత భారీ వర్షాలు కురిసే అవకాశం ఉంది. లోతట్టు ప్రాంతాలు జలమయమయ్యే ప్రమాదం ఉండటంతో పాటు పంట చేతికొచ్చే సమయంలో వరి, కొబ్బరి రైతులకు తీవ్ర నష్టం వాటిల్లే అవకాశం కనిపిస్తోంది. సముద్రం తీవ్రంగా అల్లకల్లోలంగా మారనున్నందున మత్స్యకారులు ఎవరూ వేటకు వెళ్లవద్దని అధికార యంత్రాంగం స్పష్టమైన ఆదేశాలు జారీ చేసింది. తీరప్రాంత ప్రజలు, రైతులు నిరంతరం అప్రమత్తంగా ఉండాలని, తుఫాను సహాయక బృందాల హెచ్చరికలను పాటించాలని విపత్తు నిర్వహణ శాఖ కోరింది.