Stock Market: వచ్చే వారం స్టాక్ మార్కెట్ ఎలా ఉండబోతోంది..? నిపుణులు ఏమంటున్నారంటే..

పశ్చిమాసియా (Middle East) దేశాల మధ్య ఉద్రిక్తతలు పెరగడం, అంతర్జాతీయ మార్కెట్లో ముడి చమురు (Crude oil) ధరలు పెరగడం వంటి కారణాల వల్ల ఇన్వెస్టర్లలో ఆందోళన మొదలైంది. దీనికి తోడు అంతర్జాతీయ మార్కెట్లు బలహీనంగా ఉండటం, విదేశీ ఇన్వెస్టర్లు మన మార్కెట్ నుంచి పెట్టుబడులను ఉపసంహరించుకోవడం, రూపాయి విలువ పడిపోవడం వంటివి స్టాక్ మార్కెట్‌ను భారీగా దెబ్బతీశాయి. వరుసగా మూడో రోజు కూడా భారీ నష్టాలను నమోదు చేసింది. ట్రేడింగ్ సమయంలో 1,579 పాయింట్లు పడిపోయిన సెన్సెక్స్, చివరకు 1,470 పాయింట్ల (1.93%) నష్టంతో 74,563 వద్ద ముగిసింది. నిఫ్టీ దాదాపు 488 పాయింట్లు (2.06%) నష్టపోయి 23,151 వద్ద స్థిరపడింది. ఈ వారంలో నిఫ్టీ 5.3 శాతం, సెన్సెక్స్ 5.5 శాతం మేర నష్టపోయాయి. జూన్ 2022 తర్వాత నిఫ్టీకి ఇదే అతిపెద్ద వారపు నష్టం కావడం గమనార్హం.

Also Read:GST: తెలంగాణలో భారీ జీఎస్టీ కుంభకోణం.. రూ.84 కోట్లు కొట్టేసిన కేటుగాడు..

మార్కెట్ నిపుణులు ఏమంటున్నారు?
మార్కెట్ ఇప్పుడు ‘ఓవర్ సోల్డ్’ (Oversold) స్థితిలో ఉందని విశ్లేషకులు చెబుతున్నారు. అంటే స్టాక్స్ చాలా తక్కువ ధరకు పడిపోయాయని అర్థం. బజాజ్ బ్రోకింగ్ నిపుణుల అభిప్రాయం ప్రకారం.. మార్కెట్ సూచీలు ఓవర్ సోల్డ్ స్థాయికి చేరుకున్నాయి. దీనివల్ల త్వరలోనే మార్కెట్ కొంచెం కోలుకునే అవకాశం ఉంది, కానీ ఇప్పటికైతే మార్కెట్ మళ్లీ పుంజుకుంటుందనే సంకేతాలు (Reversal signs) ఏమీ కనిపించడం లేదు. మార్కెట్ తన పాత గరిష్ట స్థాయిలను అందుకుంటేనే పరిస్థితి మెరుగుపడే అవకాశం ఉంది. రిలిగేర్ బ్రోకింగ్ (అజిత్ మిశ్రా) అభిప్రాయం ప్రకారం.. ఓవర్ సోల్డ్ స్థాయిలో ఉన్నప్పటికీ, మార్కెట్ తన సపోర్ట్ లెవల్స్‌లను కాపాడుకోలేకపోతోందన్నారు. ముఖ్యంగా వడ్డీ రేట్లపై ఆధారపడిన రంగాలపై తీవ్ర ఒత్తిడి కనిపిస్తోందన్నారు.

Also Read:Gas Effect: గ్యాస్ కొరత.. పెరిగిన హోటల్ ఫుడ్ ఐటమ్స్ ధరలు..

హెచ్‌డిఎఫ్‌సి సెక్యూరిటీస్ (నాగరాజ్ శెట్టి) అభిప్రాయం ప్రకారం.. మార్కెట్ ధోరణి ప్రస్తుతం ప్రతికూలంగా ఉంది. వచ్చే వారంలో నిఫ్టి 22,900 స్థాయిల వద్ద చిన్నపాటి రికవరీ కనిపించే అవకాశం ఉందన్నారు. ఒకవేళ అది కూడా సాధ్యం కాకపోతే, మార్కెట్ మరింత పడిపోయి 22,000 స్థాయికి చేరుకునే అవకాశం ఉందని ఆయన హెచ్చరించారు. మొత్తం 16 ప్రధాన రంగాల సూచీలు కూడా నష్టాల్లోనే ముగిశాయి. స్మాల్‌క్యాప్, మిడ్‌క్యాప్ స్టాక్స్ కూడా అమ్మకాల ఒత్తిడిలో ఉన్నాయి. రాబోయే రోజుల్లో అంతర్జాతీయ పరిస్థితులు ఎలా ఉంటాయో అన్నదే మార్కెట్ భవిష్యత్తును నిర్ణయించనుంది.