AP Govt: కీలక నిర్ణయం తీసుకున్న ఏపీ ప్రభుత్వం.. భూములిచ్చేవారికి కౌలు రూ.40 వేలు..

ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (CRDA) సమావేశం ముఖ్యమంత్రి నారా చంద్రబాబు నాయుడు అధ్యక్షతన వెలగపూడి సచివాలయంలో అత్యంత ప్రాధాన్యత సంతరించుకుంది. అమరావతి నిర్మాణానికి భూములిచ్చిన రైతులు, ల్యాండ్ పూలింగ్ బాధితుల ప్రయోజనాలే పరమావధిగా ఈ భేటీలో ప్రభుత్వం పలు సంచలన నిర్ణయాలు తీసుకుంది. గత ఐదేళ్లుగా ఎదురుచూస్తున్న రాజధాని ప్రాంత రైతులకు ఈ నిర్ణయాలు పెద్ద ఊరటనిచ్చాయి.

పెరిగిన వార్షిక కౌలు..
రాజధాని కోసం స్వచ్ఛందంగా భూములిచ్చిన అన్నదాతలకు ప్రభుత్వం ఇచ్చే వార్షిక కౌలు మొత్తాన్ని భారీగా పెంచుతూ సీఆర్డీఏ బోర్డు ఆమోదం తెలిపింది.జూన్ 2024 నుంచి వర్తించేలా, భూములు ఇచ్చిన రైతులకు ఏడాదికి రూ. 40,000 చొప్పున కౌలు చెల్లించనున్నారు. ఈ పెంపుదల వారు భూములు అప్పగించినప్పటి నుంచి పదేళ్ల కాలపరిమితి వరకు వర్తిస్తుంది.

జరీబు (పండని/నదీ తీర) భూములకు ఇచ్చే కౌలును రూ. 5,000, మెట్ట భూములకు ఇచ్చే కౌలును రూ. 3,000 చొప్పున అదనంగా పెంచేందుకు ప్రభుత్వం అంగీకరించింది. రాజధాని పరిధిలోని గ్రామ కంఠాల్లో నివాసాలు, భూములు కోల్పోతున్న నిర్వాసితులకు అండగా నిలుస్తూ, వారికి ఏటా రూ. 10,000 చొప్పున ప్రత్యేక ఆర్థిక సహాయం అందించడానికి ప్రభుత్వం గ్రీన్ సిగ్నల్ ఇచ్చింది.

కొత్త ల్యాండ్ పూలింగ్ రైతులకు రుణమాఫీ అస్త్రం..
రాజధాని విస్తరణ, పెండింగ్ పనుల పూర్తి కోసం కొత్తగా ల్యాండ్ పూలింగ్‌లో భాగస్వామ్యమయ్యే గ్రామాల్లోని రైతులకు ప్రభుత్వం బంపర్ ఆఫర్ ప్రకటించింది. కొత్తగా భూములిచ్చే రైతులను ప్రోత్సహించేందుకు రుణమాఫీ పథకాన్ని తెరపైకి తెచ్చింది. ఈ రుణమాఫీ ప్రయోజనం కేవలం ఈ ఏడాది జనవరి 6వ తేదీ లోపు బ్యాంకుల నుండి వ్యవసాయ రుణాలు తీసుకున్న రైతులకు మాత్రమే వర్తిస్తుందని ప్రభుత్వం స్పష్టం చేసింది. దీనివల్ల కొత్తగా భూములు ఇచ్చేందుకు ముందుకు వచ్చే రైతులకు ఆర్థిక భారం తప్పనుంది.

అమరావతిని ప్రపంచస్థాయి రాజధానిగా నిర్మించాలనే సంకల్పంతో ఉన్న కూటమి ప్రభుత్వం, ఈ నిర్ణయాల ద్వారా క్షేత్రస్థాయిలో రైతుల్లో నమ్మకాన్ని పునరుద్ధరించాలని భావిస్తోంది. భూములిచ్చిన ప్రతి ఒక్కరికీ న్యాయం చేయడమే తమ మొదటి ప్రాధాన్యతని ఈ సమావేశం ద్వారా ప్రభుత్వం స్పష్టం చేసింది.