OTR : పుంగనూరు స్థానిక సమరం రణరంగంగా మారుతుందా.?

OTR : స్థానిక సమరం ముంగిట్లో ఉమ్మడి చిత్తూరు జిల్లాలో పొలిటికల్ హీట్‌ మిగతా వాటికంటే ఎక్కువగా పెరిగిపోతోంది. అన్నిటికీ మించి అందరి దృష్టి ఇప్పుడు పుంగనూరు వైపే ఉంది. వైసీపీ కీలక నాయకుడు పెద్దిరెడ్డి రామచంద్రారెడ్డి ఇక్కడి నుంచి ఎమ్మెల్యేగా ఉన్నారు. గత స్థానిక ఎన్నికల్లో ఇక్కడ వైసీపీకి వార్‌ వన్‌సైడే అన్నట్టు ఉంది. అందుకే…ఇప్పుడు మేం అధికారంలో ఉన్నాం కాబట్టి…మా సత్తా ఏంటో చూపిస్తామంటున్నారు టీడీపీ లీడర్స్‌. అదే సమయంలో తమ పట్టు తగ్గకుండా వైసీపీ ముఖ్యులు తీసుకుంటున్న చర్యలతో పుంగనూరులో హై వోల్టేజ్‌ పాలిటిక్స్‌ నడుస్తున్నాయి. ఇది కేవలం ఒక మున్సిపాలిటీ ఎన్నికో, లేదా ఎంపీటీసీ, జడ్పీటీసీ ఎన్నికో కాదని, అది పూర్తిగా ఉమ్మడి జిల్లా మీద ప్రభావం చూపే అంశమని నమ్ముతున్నాయట రెండు వర్గాలు. ఆ దిశగా రెండు పార్టీల అధిష్టానాల నుంచి ఇప్పటికే క్షేత్ర స్థాయికి సంకేతాలు వెళ్లినట్టు చెప్పుకుంటున్నారు.

గత అసెంబ్లీ ఎన్నికల్లోనే పుంగనూరులో పెద్దిరెడ్డి రామచంద్రారెడ్డిని ఓడించేందుకు టీడీపీ గట్టిగా ప్రయత్నించింది. అయితే…. పెద్దిరెడ్డి గెలిచినా మెజార్టీ మాత్రం బాగా తగ్గింది. ఇక రాబోయే స్థానిక ఎన్నికల్లో ఎలాగైనా పుంగనూరు మున్సిపాలిటీని కైవసం చేసుకుని పెద్దిరెడ్డి కుటుంబ ఆధిపత్యానికి వాళ్ల సొంత ప్రాంతంలోనే చెక్‌ పెట్టాలన్నది అధికార పార్టీ ప్లాన్‌ అట. గట్టి సమాధానం చెప్పాలన్న వ్యూహంతో టీడీపీ నేతలు ప్రత్యేక ప్రణాళికలతో పావులు కదుపుతున్నట్టు చెప్పుకుంటున్నారు. తాము మున్సిపల్ పీఠాన్ని దక్కించుకుంటే… పెద్దిరెడ్డి రాజకీయ కోటకు బీటలు వారినట్టేనని తమ్ముళ్లు గట్టిగా నమ్ముతున్నారట. అందుకోసం ప్రతి వార్డునూ ప్రతిష్ఠాత్మకంగా తీసుకుని ఓటర్లను ఆకర్షించే ప్రయత్నాన్ని ఇప్పట్నుంచే మొదలు పెట్టినట్టు తెలుస్తోంది. గత ఎన్నికలలో పెద్దిరెడ్డిని ఓడిస్తానని డైరెక్ట్‌గానే సవాల్ చేశారు సీఎం చంద్రబాబు. అది తృటిలో తప్పిపోయినా… మున్సిపాలిటీలో మాత్రం గట్టి షాక్‌ ఇవ్వాలని లోకల్ లీడర్స్‌కు పై నుంచి ఆదేశాలు వచ్చినట్టు ప్రచారం జరుగుతోంది.

పుంగనూరు టీడీపీ ఇన్చార్జ్‌గా చల్లా బాబును తప్పించి మధసూదన్‌ నాయుడుని బరిలో దింపడం అందులో భాగమేనని అంచనా వేస్తున్నాయి రాజకీయవర్గాలు. అలాగే… స్థానిక ఎన్నిక బాద్యతల్ని పార్టీ సీనియర్ నేతలకు అప్పగించబోతున్నారట. అదే సమయంలో పెద్దిరెడ్డి రామచంద్రారెడ్డి సైతం తన కంచుకోట బీటలు వారకుండా…కాపాడుకునేందుకు సర్వశక్తులూ ఒడ్డుతున్నట్టు తెలుస్తోంది. అధికార పార్టీ ప్లాన్స్‌ని దీటుగా తిప్పికొట్టే వ్యూహాలు సిద్ధం చేసుకుంటున్నట్టు సమాచారం. దీంతో పుంగనూరు స్థానిక సమరం అంగబలం, అర్థ బలాల మధ్య నడిచే రణరంగంగా మారబోతోందని చెప్పుకుంటున్నారు. కేడర్‌ను ఏకతాటిపైకి తెచ్చి, అసమ్మతి కుంపట్లను ఆర్పేసి, ప్రజల నాడిని పట్టుకుని ఓట్లను కొల్లగొట్టే వ్యూహాన్ని ఎవరు సక్రమంగా అమలు చేస్తే… వాళ్ళదే గెలుపు అంటున్నారు పరిశీలకులు. ఈ పోరు అత్యంత ప్రతిష్టాత్మకంగా మారిపోవడంతో…ఏ పార్టీ గెలిచినా మరొకరికి షాక్‌ తప్పదన్న అంచనాలు పెరుగుతున్నాయి.