Aadhar Update Charges: ఆధార్ అప్డేట్ చేసుకోవాలా..? అయితే కొత్త ఛార్జీలపై ఓ లుక్కేయండి..
నేటి కాలంలో ప్రతి భారతీయుడికి ‘ఆధార్’ అనేది ఒక అనివార్యమైన గుర్తింపు పత్రంగా మారింది. ప్రభుత్వ పథకాలు పొందాలన్నా, బ్యాంకు ఖాతా తెరవాలన్నా ఆధార్ తప్పనిసరి. అయితే, ఆధార్లోని వివరాలు ఎప్పటికప్పుడు సరిగ్గా ఉండటం చాలా ముఖ్యం. దీని కోసం భారత విశిష్ట గుర్తింపు ప్రాధికార సంస్థ (UIDAI) వివిధ రకాల అప్డేట్ సేవలను అందిస్తోంది. ఈ సేవలకు సంబంధించి వసూలు చేసే రుసుముల వివరాలను ప్రజల అవగాహన కోసం స్పష్టంగా ప్రకటించింది.
1. ఆధార్ నమోదు (Enrolment)
కొత్తగా ఆధార్ కార్డు కోసం దరఖాస్తు చేసుకోవడం పూర్తిగా ఉచితం. దీని కోసం ఎటువంటి రుసుము చెల్లించాల్సిన అవసరం లేదు.
2. బయోమెట్రిక్ అప్డేట్ (Biometric Update)
వేలిముద్రలు (Fingerprint), కనుపాప (Iris) , ఫోటో వంటి వివరాలను మార్చుకోవడానికి ఈ సేవ ఉపయోగపడుతుంది. దీనిలో సాధారణ బయోమెట్రిక్ అప్డేట్కు రూ.125 చెల్లించాలి. 5 నుంచి 17 సంవత్సరాల మధ్య వయస్సు ఉన్న పిల్లలకు చేసే ‘తప్పనిసరి బయోమెట్రిక్ అప్డేట్’ పూర్తిగా ఉచితం. ఈ సౌకర్యం సెప్టెంబర్ 30, 2026 వరకు అందుబాటులో ఉంటుంది.
3. డెమోగ్రాఫిక్ అప్డేట్ (Demographic Update)
పేరు, పుట్టిన తేదీ, లింగం, చిరునామా, మొబైల్ నంబర్ లేదా ఈమెయిల్ ఐడి వంటి వివరాలను సవరించుకోవడానికి..రూ.75 రుసుము చెల్లించాలి.
4. డాక్యుమెంట్ అప్డేట్ (Document Update)
గుర్తింపు , చిరునామా ధృవీకరణ పత్రాలను సమర్పించి ఆధార్ను అప్డేట్ చేసుకోవాలంటే.. మీరు నేరుగా ఆధార్ కేంద్రానికి వెళ్లి డాక్యుమెంట్ అప్డేట్ చేయించుకుంటే రూ.75 చెల్లించాలి.
‘myAadhaar’ పోర్టల్ ద్వారా ఆన్లైన్లో స్వయంగా చేసుకుంటే జూన్ 14, 2026 వరకు ఈ సేవ ఉచితంగా పొందవచ్చు. పైన పేర్కొన్న రుసుములన్నీ వర్తించే పన్నులతో (Taxes) కలిపి ఉంటాయి. అదనపు మొత్తాన్ని ఎవరైనా డిమాండ్ చేస్తే ఫిర్యాదు చేయవచ్చు. మీ ఆధార్ వివరాలను ఎప్పటికప్పుడు అప్డేట్ గా ఉంచుకోవడం ద్వారా ప్రభుత్వ సేవలను ఎలాంటి అంతరాయం లేకుండా పొందవచ్చు.