Mark Zuckerberg: ఫేస్‌బుక్‌ను సృష్టించిన ‘డ్రాపౌట్’.. వేల కోట్ల సామ్రాజ్యాన్ని నిర్మించిన జుకర్‌బర్గ్‌కు డిగ్రీ లేదు తెలుసా!

Mark Zuckerberg: టెక్ దిగ్గజం మెటా తన వ్యూహాలను పూర్తిగా మార్చేస్తోంది. ఏఐ, మెటావర్స్ రంగాల్లో ఆధిపత్యం సాధించేందుకు సుమారు 135 బిలియన్ డాలర్ల భారీ పెట్టుబడి పెట్టాలని జుకర్‌బర్గ్ నిర్ణయించారు. అయితే ఈ ఖర్చును బ్యాలెన్స్ చేసేందుకు కంపెనీ వర్క్‌ఫోర్స్‌లో 10 శాతం కోత విధించబోతున్నారు. ఆర్టిఫిషియల్ ఇంటెలిజెన్స్ (AI) రేసులో గెలవడానికి మెటా అధినేత మార్క్ జుకర్‌బర్గ్ కఠిన నిర్ణయాలు తీసుకుంటున్నారు. భవిష్యత్తు టెక్నాలజీ కోసం ఏకంగా రూ.11 లక్షల కోట్ల రూపాయల భారీ పెట్టుబడిని ప్రకటించిన ఆయన, మరోవైపు కంపెనీలో భారీగా ఉద్యోగాల కోతకు తెరలేపారు.

లేఆఫ్స్ లెక్క ఇదీ..
సుమారు 8,000 మంది ఉద్యోగులను మెటా నేరుగా తొలగించనుంది. ఇదే సమయంలో గతంలో ఖాళీగా ఉన్న మరో 6,000 పోస్టులను ఎప్పటికీ భర్తీ చేయకూడదని నిర్ణయించారు. మొత్తంగా 14,000 కొలువులపై ఈ నిర్ణయం ప్రభావం చూపనుంది.

డ్రాపౌట్ టు టెక్ కింగ్.. జుకర్‌బర్గ్ ప్రస్థానం ఇదే
ఒక్క నిర్ణయంతో వేల మంది అర్హత గల ఇంజినీర్లను రోడ్డున పడేస్తున్న జుకర్‌బర్గ్ చదువు గురించి ఇప్పుడు సోషల్ మీడియాలో పెద్ద ఎత్తున చర్చ జరుగుతోంది. ఎంతో మంది ఇంజినీర్ల భవిష్యత్తును శాసిస్తున్న ఆయన విద్యా ప్రయాణం ఒక సినిమాను తలపిస్తుంది. స్కూల్ రోజుల్లోనే జుకర్‌బర్గ్ ఖగోళశాస్త్రం, గణితం, భౌతికశాస్త్రంలో అద్భుత ప్రతిభ చూపి ఎన్నో అవార్డులు గెలుచుకున్నారు. లాటిన్, గ్రీక్ భాషల్లో డిప్లొమా కూడా చేశారు. ప్రపంచంలోనే నంబర్ 1 యూనివర్సిటీ అయిన హార్వర్డ్‌లో కంప్యూటర్ సైన్స్, సైకాలజీ చదువుతూ.. రెండో ఏడాదిలోనే ‘ఫేస్‌బుక్’ క్రేజ్ చూసి చదువు మధ్యలోనే ఆపేశారు. అందుకే ఆయనను ‘కాలేజీ డ్రాపౌట్’ అని పిలుస్తారు. చదువు మానేసిన 12 ఏళ్ల తర్వాత, 2017లో అదే హార్వర్డ్ యూనివర్సిటీ జుకర్‌బర్గ్‌ను ఆహ్వానించి ‘డాక్టర్ ఆఫ్ లాస్’ గౌరవ పట్టాతో సత్కరించింది.

ఫేస్‌బుక్ ప్రస్థానం..
2004 ఫిబ్రవరి 4న “ది ఫేస్‌బుక్” పేరుతో ప్రారంభించి, 2005లో “ఫేస్‌బుక్”గా మార్చారు. కంపెనీ కేవలం సోషల్ మీడియాకే పరిమితం కాకూడదనే ఉద్దేశంతో వాట్సాప్, ఇన్‌స్టాగ్రామ్, వర్చువల్ రియాలిటీ (VR) వంటి రంగాల్లో విస్తరించాక, మాతృ సంస్థ పేరును ‘మెటా’ (Meta)గా మార్చారు. మెటా అనేది ఒక పేరెంట్ కంపెనీ. దీని కింద మనం నిత్యం వాడే ఫేస్‌బుక్, ఇన్‌స్టాగ్రామ్, వాట్సాప్, మెసెంజర్, థ్రెడ్స్ వంటి దిగ్గజ ప్లాట్‌ఫారమ్‌లు ఉన్నాయి.