ముస్లిం యువతుల వివాహాలపై పంజాబ్‌, హర్యానా హైకోర్టు కీలక నిర్ణయం తీసుకుంది. 16 ఏళ్లు నిండిన ముస్లిం యువతి తనకు నచ్చిన వ్యక్తిని వివాహం చేసుకోవచ్చని హైకోర్టు సింగిల్ బెంచ్ తీర్పులో పేర్కొంది. 21 ఏళ్ల యువకుడు, 16 ఏళ్ల యువతి కుటుంబ సభ్యుల నుంచి తమ ప్రాణాలకు రక్షణ కల్పించాలంటూ హైకోర్టును ఆశ్రయించిన ముస్లిం దంపతుల రక్షణ పిటిషన్‌ను జస్టిస్ జస్జిత్ సింగ్ బేడీ ధర్మాసనం విచారిస్తూ ఈ తీర్పును వెలువరించింది. జస్టిస్ బేడి షరియా చట్టాన్ని ప్రస్తావించారు. షరియా చట్టం ప్రకారం పురుషులు, మహిళలు 15 సంవత్సరాల వయస్సులో పెద్దలుగా పరిగణిస్తారు. రెండు వారాల క్రితం పెళ్లి చేసుకున్న ఈ జంట తమకు రక్షణ కల్పించాలంటూ కోర్టును ఆశ్రయించగా.. విచారించిన న్యాయస్థానం ఈ మేరకు తీర్పును వెలువరించింది. ఈ ఇద్దరు ప్రేమికులు జూన్ 8, 2022న ముస్లిం ఆచారాల ప్రకారం వివాహం చేసుకున్నారు.
వారి కుటుంబాలు ఆ పెళ్లిని వ్యతిరేకించడంతో పాటు నూతన దంపతులను వారి కుటుంబసభ్యులు బెదిరించినట్లు ఆరోపణలు వచ్చాయి. దీంతో నవ వధూవరులు హైకోర్టును ఆశ్రయించారు. జస్టిస్ బేడీ తన తీర్పులో ముస్లిం వ్యక్తిగత చట్టంపై దిన్షా ఫర్దూన్ జీ ముల్లా యొక్క పుస్తకాన్ని ఉదహరించారు. ఆ పుస్తకంలోని సెక్షన్ 195 ప్రకారం 16 ఏళ్లు పైబడిన అమ్మాయి తనకు నచ్చిన వ్యక్తిని పెళ్లి చేసుకోవచ్చని న్యాయమూర్తి తెలిపారు. నూతన దంపతులకు సరైన భద్రత కల్పించాలని పఠాన్‌కోట్ పోలీసులను జస్టిస్ బేడీ ఆదేశించారు. ఎందుకంటే వారు ఇష్టానుసారం వివాహం చేసుకున్నందున వారి ప్రాథమిక హక్కులను తిరస్కరించలేమని హైకోర్టు జస్టిస్ తన తీర్పులో పేర్కొన్నారు.
Asaduddin Owaisi: మోడీ జీ.. మీ ఫ్రెండ్ అబ్బాస్ అడ్ర‌స్ ఇవ్వండి