Madras High Court: పిల్లలను కనకపోతే క్రూరత్వమా?.. విడాకుల కేసుపై మద్రాస్ హైకోర్టు కీలక వ్యాఖ్యలు

సంతానలేమిపై మద్రాస్ హైకోర్టు కీలక వ్యాఖ్యలు చేసింది. సంతానం లేకపోవడాన్ని క్రూరత్వంగా పరిగణించలేమని న్యాయస్థానం స్పష్టం చేసింది. కేవలం దంపతులు కాలేదన్న కారణంతో భార్యను దోషిగా పేర్కొనలేమని తెలిపింది. జస్టిస్‌లు జి.ఆర్. స్వామినాథన్, ఎం.డి. సుమతిలతో కూడిన ధర్మాసనం… భార్యకు సంతానం కలగకపోవడాన్ని ‘వైవాహిక దోషం’గా పరిగణించలేమని తీర్పు ఇచ్చింది. భార్య క్రూరంగా ప్రవర్తిస్తోందని ఆరోపిస్తూ విడాకులు కోరుతూ భర్త దాఖలు చేసిన పిటిషన్‌ను మద్రాసు హైకోర్టు కొట్టివేసింది.

భార్య క్రూరత్వం కారణంగా సంతానం కలగలేదని.. తనకు విడాకులు ఇవ్వాలంటూ ఓ భర్త పిటిషన్ వేశాడు. ఈ పిటిషన్‌ను ఫ్యామిలీ కోర్టు కొట్టేసింది. అనంతరం బాధితుడు హైకోర్టును ఆశ్రయించాడు. విచారణ అనంతరం హైకోర్టు కూడా పిటిషన్‌ను కొట్టేసింది. వివాహం యొక్క ఉద్దేశం పిల్లలను కనడం మాత్రమే కాదని.. సంతానం లేనంతమాత్రాన వైవాహిక సంబంధంలో ఏ భాగస్వామి విఫలమైనట్లు కాదని కోర్టు పేర్కొంది.

అసలు విషయం ఏమిటి?

బార్ అండ్ బెంచ్ నివేదిక ప్రకారం.. ఆ దంపతులు జూన్ 2007లో వివాహం చేసుకున్నారు. మొదట్లో వివాహ జీవితం సజావుగా సాగినప్పటికీ… ఆ తర్వాత భార్య తనను అవమానించడం, పని నుంచి ఆలస్యంగా ఇంటికి వచ్చినప్పుడు అనుమానించడం, తరచుగా ఇంటి నుంచి బయటకు వెళ్లిపోవడం ప్రారంభించిందని భర్త ఆరోపించాడు. 2016 జూన్‌లో తన భార్య బహిరంగంగా తనను నపుంసకుడని పిలిచిందని.. చెప్పుతో, ఆ తర్వాత చీపురుతో కొట్టిందని, మంగళసూత్రాన్ని తీసివేసిందని, ఫొటోలను చించివేసి ఇంటి నుంచి వెళ్లిపోయిందని ఆరోపించాడు. అయితే భర్త ఆరోపణలను భార్య ఖండించింది. తాను గర్భాశయ ఫైబ్రాయిడ్లకు శస్త్రచికిత్స చేయించుకున్నానని, అలాగే బిడ్డను కని తన వైవాహిక జీవితాన్ని కొనసాగించాలనే ఆశతో చికిత్స కూడా తీసుకున్నానని తెలిపింది.

శారీరక, మానసిక ఇబ్బందులు తెలిసినప్పటికీ, బిడ్డను కనాలని, వైవాహిక బంధాన్ని కాపాడుకోవాలని ఆశతో భార్య సంతోషంగా అటువంటి చికిత్సను భరిస్తే, ఆమె ప్రవర్తనను ఏ విధంగానూ వివాహాన్ని తిరస్కరించినట్లుగా గానీ, భర్త పట్ల క్రూరత్వంగా గానీ పరిగణించలేమని కోర్టు పేర్కొంది. భర్తతో కుటుంబాన్ని ఏర్పరచుకోవాలనే ఆశతో పదేపదే బాధాకరమైన చికిత్స చేయించుకునే స్త్రీ, వైవాహిక బంధాన్ని విడిచిపెట్టిన వ్యక్తిగా పరిగణించబడదని తెలిపింది. పిల్లలు లేకపోవడం వల్ల భార్యాభర్తలిద్దరూ మానసిక వేదనకు గురైనప్పటికీ, సంతానలేమి చికిత్స వల్ల కలిగే శారీరక పరిణామాలను భరించాల్సింది మహిళేనని కూడా కోర్టు పేర్కొంది. దంపతులు చాలా కాలం పాటు విడివిడిగా ఉండటం క్రూరత్వాన్ని లేదా వివాహం పూర్తిగా విచ్ఛిన్నమవ్వడాన్ని నిరూపించడానికి సరిపోతుందనే వాదనను కూడా కోర్టు తిరస్కరించింది.