Delhi: కాంగ్రెస్ ఎంపీపై లైంగిక వేధింపుల ఆరోపణలు.. జేఎన్‌యూ నుంచి అంగోంచా తొలగింపు

కాంగ్రెస్ ఎంపీ, జవహర్‌లాల్ నెహ్రూ యూనివర్సిటీ (JNU) ప్రొఫెసర్ అంగోంచా బిమోల్ అకోయిజమ్‌పై వేటు పడింది. లైంగిక వేధింపుల ఆరోపణలపై నిర్వహించిన విచారణ అనంతరం ఆయనను ఉద్యోగం నుంచి తక్షణమే తొలగిస్తూ యూనివర్సిటీ నిర్ణయం తీసుకుంది.

అక్టోబర్ 9న జారీ చేసిన ఉత్తర్వుల్లో ఈ విషయాన్ని వెల్లడించింది. JNU వైస్‌ ఛాన్సలర్ శాంతిశ్రీ డి. పండిట్ సంతకం చేసిన ఈ ఉత్తర్వుల ప్రకారం.. యూనివర్సిటీలోని అంతర్గత కమిటీ లైంగిక ఆరోపణలపై విచారణ చేపట్టింది. విచారణ అనంతరం అకోయిజమ్‌పై కఠినమైన క్రమశిక్షణ చర్యలు తీసుకోవాలని కమిటీ సిఫార్సు చేసింది. విచారణకు సంబంధించిన ప్రక్రియను నిబంధనల ప్రకారం పూర్తి చేసినట్లు JNU తెలిపింది. అందుబాటులో ఉన్న వాస్తవాలు, అంతర్గత కమిటీ సమర్పించిన నివేదికను పరిశీలించిన తర్వాత అకోయిజమ్‌ను ఉద్యోగం నుంచి తొలగించాలని నిర్ణయించినట్లు వెల్లడించింది.

2024లో కాంగ్రెస్ తరఫున ఎంపీగా విజయం

అంగోంచా బిమోల్ అకోయిజమ్ JNUలోని స్కూల్ ఆఫ్ సోషల్ సైన్సెస్ పరిధిలో ఉన్న సెంటర్ ఫర్ ది స్టడీ ఆఫ్ సోషల్ సిస్టమ్స్‌లో ప్రొఫెసర్‌గా పనిచేశారు. 2024 లోక్‌సభ ఎన్నికల్లో కాంగ్రెస్ పార్టీ తరఫున మణిపూర్‌లోని ఇన్నర్ మణిపూర్ నియోజకవర్గం నుంచి పోటీ చేసి ఎంపీగా ఎన్నికయ్యారు. అయితే ఆయనపై లైంగిక వేధింపుల ఆరోపణలపై జరిగిన విచారణ అనంతరం యూనివర్సిటీ ఈ చర్య తీసుకోవడం ప్రాధాన్యం సంతరించుకుంది.