Jewar Toll Plaza: కేంద్రం గుడ్‌న్యూస్.. 14 ఏళ్ల డిమాండ్‌కు పరిష్కారం.. అక్కడ టోల్ ఫ్రీ ప్రయాణం..
- Follow Us :
-
-
Add as a preferred
source on google
Jewar Toll Plaza: యమునా ఎక్స్‌ప్రెస్‌వే పరిసర ప్రాంతాల్లో నివసించే స్థానికులకు భారీ ఊరట లభించనుంది. జేవర్ టోల్ ప్లాజా మీదుగా ప్రయాణించే అర్హత కలిగిన స్థానికులకు సెప్టెంబర్ 17, 2026 నుంచి టోల్ మినహాయింపు కల్పించనున్నారు. దీంతో జేవర్, గ్రేటర్ నోయిడా, ఆగ్రా మధ్య తరచూ ప్రయాణించే స్థానికులకు టోల్ భారం తగ్గనుంది. 165 కిలోమీటర్ల పొడవైన యమునా ఎక్స్‌ప్రెస్‌వే గ్రేటర్ నోయిడాను ఆగ్రాతో కలుపుతుంది. ఈ ప్రాంతంలోని రైతులు, సామాజిక ప్రతినిధులు, స్థానిక సంస్థలు గత 14 ఏళ్లుగా టోల్ పన్ను మినహాయింపు కోసం డిమాండ్ చేస్తున్నారు. ఈ అంశంపై పలుమార్లు అధికారుల దృష్టికి తీసుకెళ్లారు.
జేవర్ ఎమ్మెల్యే ధీరేంద్ర సింగ్ ప్రకారం.. YEIDA (యమునా ఎక్స్‌ప్రెస్‌వే ఇండస్ట్రియల్ డెవలప్‌మెంట్ అథారిటీ), ఎక్స్‌ప్రెస్‌వే నిర్వహణ సంస్థ అధికారులతో అనేక దఫాలుగా చర్చలు జరిపిన అనంతరం స్థానికులకు టోల్ మినహాయింపు కల్పించే నిర్ణయం తీసుకున్నారు. అయితే, టోల్ మినహాయింపు పొందాలంటే అర్హత కలిగిన స్థానికులు ముందుగా తమ వాహనాన్ని రిజిస్టర్‌ చేసుకోవాలి. సెప్టెంబర్ 17 వరకు జేవర్ టోల్ ప్లాజా మేనేజర్ కార్యాలయంలో దరఖాస్తు చేసుకోవచ్చు.
రిజిస్ట్రేషన్ సమయంలో స్థానికులు ఈ మూడు పత్రాల కాపీలను సమర్పించాలి:
* స్థానిక నివాస ధ్రువీకరణ పత్రం
* ఆధార్ కార్డు
* వాహనం రిజిస్ట్రేషన్ సర్టిఫికెట్ (RC)
పత్రాల పరిశీలన, వాహన రిజిస్ట్రేషన్ ప్రక్రియ పూర్తయిన తర్వాత నిర్దేశిత విధానం ప్రకారం అర్హత కలిగిన స్థానికులకు టోల్ రహిత ప్రయాణ సౌకర్యం అందుతుంది.
జన్మాష్టమి సందర్భంగా స్థానికులకు కానుక
జేవర్ ఎమ్మెల్యే ధీరేంద్ర సింగ్ మాట్లాడుతూ.. స్థానిక నివాస ధ్రువీకరణ, ఆధార్ కార్డు, వాహనం RC సమర్పించి అర్హత కలిగిన పౌరులు రిజిస్ట్రేషన్ చేసుకోవచ్చని తెలిపారు. శ్రీకృష్ణ జన్మాష్టమి, ప్రధాని నరేంద్ర మోదీ జన్మదినం సందర్భంగా సెప్టెంబర్ 17న స్థానికులకు ఈ నిర్ణయం ఒక ముఖ్యమైన కానుకగా నిలుస్తుందని పేర్కొన్నారు. ప్రస్తుతం జేవర్ టోల్ ప్లాజా వద్ద వాహనాల రకాన్ని బట్టి టోల్ రుసుములు ఉన్నాయి. ద్విచక్ర వాహనాలు, త్రిచక్ర వాహనాలు, ట్రాక్టర్లకు రూ.60, కార్లకు రూ.120 వసూలు చేస్తున్నారు. లైట్ కమర్షియల్ వాహనాలకు రూ.185, బస్సులు, ట్రక్కులకు రూ.380 టోల్ ఉంది. మల్టీ యాక్సిల్ వాహనాలకు రూ.580, ఓవర్‌సైజ్ వాహనాలకు రూ.745గా టోల్ రుసుము ఉంది. స్థానికులకు టోల్ మినహాయింపు అమల్లోకి వస్తే, అర్హత కలిగిన వాహనదారులు ఈ రుసుములు చెల్లించకుండా జేవర్ టోల్ ప్లాజా మీదుగా ప్రయాణించే అవకాశం లభిస్తుంది.