Sonali Phogat Case: సోనాలీ ఫోగాట్ కేసును సీబీఐకి అప్పగించండి.. కేంద్రాన్ని కోరిన గోవా సీఎం

Sonali Phogat Case: హర్యానాలోని హిసార్ జిల్లాలో ఖాప్ మహాపంచాయత్ జరిగిన మరుసటి రోజు బీజేపీ నాయకురాలు సోనాలి ఫోగట్ హత్యపై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) దర్యాప్తును కోరుతూ గోవా ముఖ్యమంత్రి ప్రమోద్ సావంత్ ఈ హత్య కేసును కేంద్ర ఏజెన్సీకి బదిలీ చేస్తున్నట్లు ప్రకటించారు. ఆమె హత్య జరిగిన కొన్ని రోజుల తర్వాత సోనాలి ఫోగట్ కుటుంబం అదే డిమాండ్ చేస్తూ హర్యానా ముఖ్యమంత్రిని కలిశారు.

రాష్ట్ర పోలీసులపై తనకు పూర్తి విశ్వాసం ఉందని, దర్యాప్తు చాలా బాగా జరుగుతోందని.. అయితే హర్యానాలోని ప్రజల నుండి పదేపదే డిమాండ్ చేసిన తర్వాత బదిలీ కోసం హోం మంత్రి అమిత్ షాకు లేఖ రాస్తానని సావంత్ చెప్పారు. గోవా పోలీసులు ఈ కేసులో “అద్భుతమైన దర్యాప్తు” చేశారని, కొన్ని కీలకమైన ఆధారాలు కూడా లభించాయని ముఖ్యమంత్రి ప్రమోద్ సావంత్ పనాజీలో విలేకరులతో అన్నారు. కానీ హర్యానా ప్రజల నుంచి, సోనాలీ ఫోగాట్ కుమార్తె డిమాండ్ కారణంగా ఈ కేసును సీబీఐకి అప్పగించాలని.. కేంద్ర హోంమంత్రిత్వ శాఖకు లేఖ రాయాలని నిర్ణయించుకున్నామని ఆయన వెల్లడించారు. కేంద్ర హోం మంత్రిత్వ శాఖకు వ్యక్తిగతంగా లేఖ రాస్తానన్నారు. ఆమె మరణించిన పరిస్థితులపై వివరాలను కోరుతూ, సోనాలీ ఫోగాట్ కుటుంబం, ముఖ్యంగా ఆమె చిన్న కుమార్తె, ఈ కేసుపై కేంద్ర ఏజెన్సీ విచారణకు డిమాండ్ చేస్తున్నారు.

NIA Raids: టెర్రర్ గ్రూపులతో లింకున్న గ్యాంగ్‌స్టర్ల అణచివేత.. భారీస్థాయిలో ఎన్‌ఐఏ దాడులు

గోవా టూర్‌కు వెళ్లిన ఆమె.. గత నెలలో ఆమె హఠాన్మరణం చెందిన విషయం తెలిసిందే. తొలుత గుండెపోటుగా భావించినప్పటికీ.. కుటుంబ సభ్యుల అనుమానాల నేపథ్యంలో దర్యాప్తు చేపట్టిన పోలీసులకు అది హత్యనే విషయం నిర్ధారణ అయ్యింది. వ్యక్తిగత సిబ్బంది సుధీర్‌ సాంగ్వాన్‌, సుధీర్‌ అనుచరుడు సుఖ్విందర్‌లు ఈ వ్యవహారంలో ప్రధాన నిందితులుగా పోలీస్‌ కస్టడీలో ఉన్నారు. సోనాలి ఫోగట్‌ హత్య జరిగిన మరుసటి రోజు నుంచే ఆమె కుటుంబం సీబీఐ దర్యాప్తునకు డిమాండ్‌ చేస్తూ వస్తోంది. ఆమెపై అత్యాచారం జరిగిందని, మత్తు పదార్థాలు ఇచ్చి మరీ అఘాయిత్యానికి పాల్పడి బ్లాక్‌ మెయిల్‌ చేశారంటూ కుటుంబ సభ్యులు.. ఆమె వ్యక్తిగత సిబ్బందిపై ఆరోపణలు గుప్పిస్తున్నారు. ఈ కేసుకు సంబంధించి గోవా పోలీసులు ఇద్దరు ఎమ్మెల్యే ఫోగాట్ సహాయకులు సహా ఐదుగురిని అరెస్టు చేశారు. ఆమె ఇద్దరు సహాయకులపై హత్యా నేరం కింద పోలీసులు కేసు నమోదు చేశారు. కంటెంట్ క్రియేటర్ అయిన సోనాలి ఫోగాట్ తన టిక్‌టాక్ వీడియోలతో ఖ్యాతిని పొందింది. 2006లో టీవీ యాంకర్‌గా రంగప్రవేశం చేసిన ఆమె రెండేళ్ల తర్వాత బీజేపీలో చేరారు.