Farooq Abdullah: ఆర్టికల్ 370 పునరుద్ధరణ, జమ్మూ కాశ్మీర్‌కు రాష్ట్ర హోదా తిరిగి కల్పించాలనే డిమాండ్లపై తమ పోరాటాన్ని మరింత ఉధృతం చేస్తామని నేషనల్ కాన్ఫరెన్స్ (NC) అధ్యక్షుడు ఫరూఖ్ అబ్దుల్లా ప్రకటించారు. కేంద్ర ప్రభుత్వం గతంలో ఇచ్చిన హామీలను నెరవేర్చలేదని ఆయన ఆరోపించారు. జమ్మూ కాశ్మీర్ ప్రజలు తమ హక్కులు, ప్రత్యేక గుర్తింపును కాపాడుకునేందుకు ఐక్యంగా పోరాడాలని పిలుపునిచ్చారు.
శనివారం బారాముల్లాలోని డాక్ బంగ్లాలో పార్టీ కార్యకర్తలతో మాట్లాడిన ఆయన.. ప్రజలు ఐక్యంగా ఉండి తమ హక్కుల కోసం పోరాడాలని అన్నారు. ‘‘మనకు ధైర్యం ఉంటే మనం వారితో పోరాడుతాం.. లేకపోతే తుడిచిపెట్టుకుపోతాం’’ అని కార్యకర్తల్ని ఉద్దేశించి వ్యాఖ్యానించారు. విభేదాలను పక్కన పెట్టి ఐక్యంగా ముందుకు సాగితే విజయం సాధించొచ్చని అన్నారు.
జమ్మూ కాశ్మీర్ ప్రత్యేక గుర్తింపును బీజేపీ, కేంద్ర ప్రభుత్వం బలహీనపరుస్తోందని ఫరూఖ్ అబ్దుల్లా విమర్శించారు. ఆర్టికల్ 370 కోసం తమ పార్టీ పోరాటాన్ని కొనసాగిస్తుందని స్పష్టం చేశారు. తమ హక్కుల కోసం పోరాడటం దేశానికి వ్యతిరేకం కాదని అన్నారు. ‘‘తాము గాంధీ-నెహ్రూల భారతదేశానికి చెందిన వాళ్లం, మా దేశభక్తిని ఎందుకు ప్రశ్నిస్తున్నారు’’ అని అన్నారు. తమ హక్కులు, డిమాండ్లను దేశవ్యతిరేక చర్యగా చిత్రీకరించడం సరికాదని అన్నారు.