High Court: కొడుకు తప్పు చేస్తే తండ్రికి సంబంధం ఏంటి? హైకోర్టు కీలక తీర్పు

ఓ గృహ హింస కేసులో ఢిల్లీ హైకోర్టు కీలక తీర్పు వెలువరించింది. వయోజనుడైన కొడుకు ప్రవర్తనకు అతడి తండ్రిని కేవలం తండ్రి అనే కారణంతో బాధ్యుడిని చేయలేమని న్యాయస్థానం స్పష్టం చేసింది. భార్యాభర్తల మధ్య వివాదంలో కొడుకు ప్రవర్తనను తండ్రి అడ్డుకోలేదన్న కారణంతో అతడిపై గృహ హింస చట్టం కింద బాధ్యత మోపలేమని తెలిపింది. ఒక వ్యక్తిపై గృహ హింసకు పాల్పడినట్లు నిర్దిష్టంగా ఆపాదించగల చర్య ఉండాలని కోర్టు పేర్కొంది.

జస్టిస్ మధు జైన్ ఆగస్టు 19, 2026న ఇచ్చిన తొమ్మిది పేజీల ఉత్తర్వుల్లో ఈ అంశాలను పరిశీలించారు. వ్యాపార వ్యవహారాల్లో జోక్యం, కార్యాలయం–ఈమెయిల్ సౌకర్యాలకు యాక్సెస్ నిరోధించడం, కుటుంబ వ్యాపారాన్ని స్వాధీనం చేసుకుంటానని లేదా మూసివేస్తానని బెదిరించడం, అత్తింటి నుంచి వెళ్లిపోవాలని చెప్పడం వంటి ఆరోపణలు ఈ కేసులో ఉన్నాయి.

ఈ కేసులో కోర్టు స్పష్టమైన సమాధానం ఇచ్చింది.. కేవలం వయోజనుడైన కొడుకు ప్రవర్తనను తండ్రి నియంత్రించలేదన్న కారణంతో అతడిని DV Act కింద బాధ్యుడిని చేయలేం అని తెలిపింది. తన భర్త మరో మహిళతో సంబంధం కలిగి ఉన్నాడని ఆరోపించిన మహిళ.. తన మామ దీనిపై భర్తను నిలదీయలేదని ఫిర్యాదులో పేర్కొంది. అయితే కోర్టు పరిశీలనలో.. కొడుకు, మరో మహిళ, వారి పిల్లలకు సంబంధించిన ఓ ప్రయాణాన్ని తండ్రి వ్యతిరేకించినట్లు కూడా రికార్డులో ఉంది. అందువల్ల కొడుకు ఆరోపించిన వైవాహిక దుష్ప్రవర్తనలో తండ్రి ప్రత్యక్షంగా పాల్గొన్నట్లు ఫిర్యాదులో కనిపించడం లేదని కోర్టు పేర్కొంది. మహిళకు, ఆమె మామకు మధ్య డొమెస్టిక్ రిలేషన్‌షిప్ ఉన్న విషయం వివాదాస్పదం కాదని కోర్టు తెలిపింది. అయితే ఆ సంబంధం ఒక్కటే DV Act కింద బాధ్యతను నిర్ధారించడానికి సరిపోదని ధర్మాసనం స్పష్టం చేసింది.