Delhi Fire Tragedy: ఢిల్లీలోని వివేక్ విహార్‌లో భారీ అగ్నిప్రమాదం.. 9 మంది మృతి

ఆదివారం ఉదయం ఢిల్లీలోని వివేక్ విహార్ ప్రాంతంలో ఒక భవనంలో భారీ అగ్నిప్రమాదం సంభవించింది. ఈ ఘటనలో కనీసం తొమ్మిది మంది మరణించగా, పలువురు తీవ్రంగా గాయపడ్డారు. అగ్నిమాపక శాఖ మంటలను చల్లార్చేందుకు శ్రమిస్తోంది. గాలింపు చర్యలు కొనసాగుతున్న కొద్దీ మృతుల సంఖ్య పెరిగే అవకాశం ఉందని అధికారులు ఆందోళన వ్యక్తం చేస్తున్నారు. తెల్లవారుజామున సుమారు 3:47 గంటలకు ఫైర్ కంట్రోల్ రూమ్‌కు కాల్ వచ్చిందని అగ్నిమాపక సిబ్బంది తెలిపారు. వెంటనే 14 అగ్నిమాపక వాహనాలు సంఘటన స్థలానికి చేరుకుని మంటలను అదుపులోకి తీసుకురావడానికి, భవనంలో చిక్కుకున్న వారిని సురక్షితంగా బయటకు తీసుకురావడానికి సహాయక చర్యలు చేపట్టాయి.

దట్టమైన పొగ నుండి 12 మందికి పైగా ప్రజలను రక్షించారు. మృతుల సంఖ్య 8 నుండి 9కి పెరిగింది. మరో నలుగురు తీవ్రంగా కాలిపోయారు. గాయపడిన వారిని సమీపంలోని ఆసుపత్రికి తరలించారు. ప్రాథమిక విచారణల ప్రకారం, భవనంలోని రెండవ అంతస్తులో ఉన్న ఒక ఫ్లాట్‌లో ఏసీ పేలుడు కారణంగా మంటలు చెలరేగి, అవి మూడవ అంతస్తుకు వ్యాపించాయి. మంటలు మూడవ అంతస్తుకు చేరిన తర్వాత ఫ్లాట్‌లోని వారు తమను తాము రక్షించుకోవడానికి ఇంటి పైకప్పుపైకి పరుగెత్తారు.

అయితే పైకప్పు తలుపు మూసి ఉండటంతో వారు మరణించినట్లు సమాచారం. రెండవ అంతస్తులోనూ నలుగురు మరణించారు. ప్రమాదంలో మృతుల గుర్తింపు ఇంకా నిర్ధారించబడలేదని, వెలికితీసిన మృతదేహాలు చాలా దారుణమైన స్థితిలో ఉన్నాయని పోలీసులు తెలిపారు. మూడు మృతదేహాలు వారి బెడ్ పైనే లభించాయని అగ్నిమాపక సిబ్బంది చెప్పారు.