Chennai Second Airport: చెన్నైకి కొత్త ఎయిర్‌పోర్టు.. విజయ్ సర్కార్ కీలక ప్రతిపాదనలు..

Chennai Second Airport: చెన్నైకి రెండో ఎయిర్‌పోర్టుపై విజయ్ సర్కార్ రెండు ప్రత్యామ్నాయ ప్రాంతాలను గుర్తించింది. పరంబూర్‌లో ప్రతిపాదించిన గ్రీన్‌ఫీల్డ్ ఎయిర్‌పోర్టు ప్రాజెక్టును విజయ్ అధికారంలోకి వచ్చిన తర్వాత రద్దు చేశారు. ఇప్పుడు కొత్తగా మానెల్లోర్, చేయ్యూర్ ప్రాంతాలను కొత్త ఎయిర్‌పోర్టు కోసం షార్ట్ లిస్ట్ చేసినట్లు తెలుస్తోంది. వారం రోజుల్లోనే ఈ రెండు ప్రాంతాలను గుర్తించినట్లు తెలుస్తోంది. ఈ రెండు ప్రాంతాలను ‘‘ఎయిర్‌పోర్ట్స్ అథారిటీ ఆఫ్ ఇండియా (AAI)’’కు పంపించి, ఫీజిబిలిటీ సర్వే చేయాలని ప్రభుత్వం సిఫారసు చేసింది. విమానాశ్రయం నిర్మాణానికి సాంకేతిక అనుకూలత, కనెక్టివిటీ, భూమి లభ్యత వంటి అంశాలను పరిశీలించి తర్వాత నిర్ణయం తీసుకోనున్నారు.

మానెల్లోర్ చెన్నైకి సుమారు 60 కిలోమీటర్ల దూరంలో ఉండగా, చేయ్యూర్ సుమారు 100 కిలోమీటర్ల దూరంలో ఉంది. ప్రతిపాదిత విమానాశ్రయం చెన్నై మెట్రోపాలిటన్ ఏరియా (CMA) అవసరాలను తీర్చేలా ఉండనుంది. పరంబూర్ ఎయిర్ పోర్టు ప్రాజెక్టు రద్దుపై విజయ్ ప్రభుత్వం ప్రతిపక్షాల నుంచి విమర్శలు ఎదుర్కొంటోంది. అయితే రైతులు, వ్యవసాయ భూములు, నివాస ప్రాంతాలపై ప్రభావాన్ని తగ్గించేందుకు పెరంబూర్ ప్రాజెక్టును రద్దు చేసినట్లు ప్రభుత్వం తెలిపింది. చెన్నైకి రెండో ఎయిర్ పోర్టు అవసరమే కానీ, దాని కోసం వ్యవసాయం భూములు, నివాస ప్రాంతాలకు తక్కువ నష్టం కలిగించే ప్రాంతాన్ని ఎంచుకోవాలని విజయ్ అసెంబ్లీలో చెప్పారు.

గతంలో స్టాలిన్ నేతృత్వంలోని డీఎంకే సర్కార్ పరంబూర్ ప్రాజెక్టు విషయంలో రైతులు, స్థానికుల నుంచి నిరసనలు ఎదుర్కొంది. ప్రాజెక్టు కోసం భారీ స్థాయిలో భూసేకరణ అవసరం కావడం, నీటి వనరులు, వ్యవసాయ భూములు కోల్పోయే అవకాశం ఉండటంతో నిరసనలు జరిగాయి. ఇప్పుడు మానెల్లోర్, చేయ్యూర్‌‌ను ప్రత్యామ్నాయంగా ఎంచుకోవడంతో విజయ్ సర్కార్ చెన్నైకి రెండో విమానాశ్రయంపై అడుగులు పడ్డాయి.