Kejriwal Health Condition: కేజ్రీవాల్ ఆరోగ్య పరిస్థితిపై తీహార్ జైలు అధికారులు క్లారిటీ..?

Kejriwal Health Condition: లిక్కర్ స్కామ్ కుంభకోణంలోని మనీలాండరింగ్ కేసులో తిహార్ జైలులో ఉన్న ఢిల్లీ ముఖ్యమంత్రి అరవింద్ కేజ్రీవాల్ బరువు తగ్గాడన్న ఆమ్ ఆద్మీ పార్టీ ఆరోపణలపై తీహార్ జైలు అధికారులు రియాక్ట్ అయ్యారు. ఈ మేరకు కేజ్రీవాల్ ఆరోగ్య పరిస్థితిపై కేంద్ర హోం శాఖ, ఢిల్లీ ప్రభుత్వానికి ఇవాళ జైలు అధికారులు లేఖ రాశారు. కేజ్రీవాల్ జైలులో 8.5 కిలోల బరువు తగ్గలేదు.. కేవలం రెండు కిలోల బరువు మాత్రమే తగ్గారు అని పేర్కొన్నారు. ఏప్రిల్ 1వ తేదీన తొలిసారిగా తీహార్‌ జైలుకు వచ్చినప్పుడు కేజ్రీవాల్ బరువు 65 కిలోలు ఉండగా.. ఎన్నికల ప్రచారం పూర్తి చేసి జూన్ 2న తిరిగి తీహార్ జైలుకు వచ్చినపుడు ఆయన బరువు 63.5 కేజీలు ఉన్నారని తీహార్ జైలు అధికారులు లేఖలో వెల్లడించారు.

Read Also: Siva karthikeyan Son Pavan: హీరో కొడుకుకు బారసాల.. పేరు ఏం పెట్టారంటే..?

కాగా, జులై 14వ తేదీన అరవింద్ కేజ్రీవాల్ బరువు 61.5 కేజీలు ఉన్నారని పేర్కొన్నారు. రెండు కిలోల బరువు మాత్రమే కేజ్రీవాల్ తగ్గిపోయారని తీహార్ జైలు అధికారులు చెప్పారు. ఉద్దేశపూర్వకంగానే స్పష్టమైన కారణాలతో కేజ్రీవాల్ బరువు తగ్గిపోయారు.. కేజ్రీవాల్ ఇంటి భోజనాన్ని తీసుకోవడం లేదు.. ఎయిమ్స్ మెడికల్ బోర్డు నిరంతరం సీఎం కేజ్రీవాల్‌ను పర్యవేక్షిస్తోందని జైలు అధికారులు చెప్పారు. కేజ్రీవాల్ భార్య సునీతా కేజ్రీవాల్ మెడికల్ బోర్డు అధికారులతో ఎప్పటికప్పుడు సంప్రదింపులు జరుపుతున్నారని వారు వెల్లడించారు. ప్రజలను గందరగోళపరిచేందుకు వారిని తప్పుదోవ పట్టించడానికి ఆప్ పార్టీ అసత్య ప్రచారం చేస్తుందని జైలు అధికారులు ఆవేదన వ్యక్తం చేశారు.