BRICS Summit 2026: మోడీ-జిన్‌పింగ్ భేటీ.. బ్రిక్స్ ఉమ్మడి ప్రకటన.. సదస్సు తొలి రోజు 10 కీలక విషయాలు

BRICS Summit 2026: రెండు రోజుల 18వ బ్రిక్స్ సదస్సు భారత రాజధాని న్యూఢిల్లీలో ప్రారంభమైంది. సదస్సు తొలిరోజు ఆర్టిఫిషియల్ ఇంటెలిజెన్స్ (AI), క్రాస్ బోర్డర్ పేమెంట్స్, ఏకపక్ష ఆంక్షలు, ఐక్యరాజ్యసమితి భద్రతా మండలి (UNSC) సంస్కరణలు సహా పలు కీలక అంశాలపై సభ్య దేశాలు చర్చించాయి. ఈ సందర్భంగా బ్రిక్స్ దేశాలు ఉమ్మడి ప్రకటనను విడుదల చేశాయి. మరోవైపు, గల్వాన్ ఘర్షణల తర్వాత తొలిసారిగా చైనా అధ్యక్షుడు షీ జిన్‌పింగ్ భారత్‌కు రావడం ఈ సదస్సుకు ప్రత్యేక ప్రాధాన్యతను తీసుకొచ్చింది. ప్రధాని నరేంద్ర మోడీ, చైనా అధ్యక్షుడు షీ జిన్‌పింగ్ మధ్య ద్వైపాక్షిక సమావేశం కూడా జరిగింది. ఈ సమావేశంలో భారత్-చైనా సంబంధాలు, పరస్పర సహకారం, ప్రపంచ సమస్యలపై ఇరు దేశాల అభిప్రాయాలపై చర్చించారు.

బ్రిక్స్ సదస్సు తొలి రోజు 10 ముఖ్య విషయాలు

1. ఏడు సంవత్సరాల తర్వాత భారత్‌కు షీ జిన్‌పింగ్

చైనా అధ్యక్షుడు షీ జిన్‌పింగ్ ఏడు సంవత్సరాల తర్వాత భారత్‌లో జరిగిన బ్రిక్స్ సదస్సుకు హాజరయ్యారు. గల్వాన్ ఘర్షణల తర్వాత ఆయన భారత్ పర్యటనకు రావడం ప్రాధాన్యత సంతరించుకుంది. బ్రిక్స్ సమావేశాల్లో పాల్గొనేందుకు వచ్చిన జిన్‌పింగ్‌కు భారత్ ప్రత్యేక స్వాగతం పలికింది.

2. మోడీ-జిన్‌పింగ్ ద్వైపాక్షిక భేటీ

బ్రిక్స్ సదస్సు సందర్భంగా ప్రధాని నరేంద్ర మోడీ, చైనా అధ్యక్షుడు షీ జిన్‌పింగ్ మధ్య ప్రత్యేక ద్వైపాక్షిక సమావేశం జరిగింది. ఇరు దేశాల మధ్య సహకారం, సంబంధాల మెరుగుదల, పరస్పర అభివృద్ధి వంటి అంశాలపై చర్చలు జరిగాయి. చైనా అధికారిక వార్తా సంస్థ షిన్హువా ప్రకారం, ఈ సమావేశంలో జిన్‌పింగ్ మాట్లాడుతూ భారత్, చైనాలు ఒకరి బలాల నుంచి మరొకరు నేర్చుకోవచ్చని, ఉమ్మడి అభివృద్ధిని సాధించవచ్చని అన్నారు. ఇరు దేశాలు కలిసి పనిచేయాల్సిన అవసరం ఉందని పేర్కొన్నారు.

3. బ్రిక్స్ ఉమ్మడి ప్రకటన విడుదల

సదస్సు తొలిరోజు బ్రిక్స్ సభ్య దేశాలు ఉమ్మడి ప్రకటనను విడుదల చేశాయి. అంతర్జాతీయ శాంతి, భద్రత, ఆర్థిక సహకారం, అభివృద్ధి వంటి అంశాలపై సభ్య దేశాల ఉమ్మడి అభిప్రాయాలను ఈ ప్రకటనలో పొందుపరిచారు. యుద్ధాలు, ఘర్షణలను నివారించడం, చర్చలు మరియు దౌత్య మార్గాల ద్వారా అంతర్జాతీయ వివాదాలను పరిష్కరించుకోవాలని సభ్య దేశాలు పిలుపునిచ్చాయి.

4. యుద్ధాలు, ఘర్షణలపై చర్చలు

బ్రిక్స్ దేశాలు ప్రపంచవ్యాప్తంగా కొనసాగుతున్న యుద్ధాలు, అంతర్జాతీయ ఉద్రిక్తతలపై ఆందోళన వ్యక్తం చేశాయి. అంతర్జాతీయ సమస్యలను శాంతియుతంగా పరిష్కరించుకోవాలని, అన్ని దేశాల అభిప్రాయాలను గౌరవించాలని ఉమ్మడి ప్రకటనలో స్పష్టం చేశాయి. ప్రపంచ శాంతి, స్థిరత్వం కోసం చర్చలు, దౌత్యానికి ప్రాధాన్యత ఇవ్వాలని సభ్య దేశాలు పేర్కొన్నాయి.

5. ఏకపక్ష టారిఫ్‌లు, నాన్-టారిఫ్ చర్యలపై ఆందోళన

బ్రిక్స్ ఉమ్మడి ప్రకటనలో ఏకపక్ష టారిఫ్‌లు, నాన్-టారిఫ్ అడ్డంకులు, ఇతర రక్షణాత్మక వాణిజ్య చర్యలపై ఆందోళన వ్యక్తమైంది. ఇటువంటి చర్యలు ప్రపంచ వాణిజ్య వ్యవస్థపై ప్రభావం చూపవచ్చని సభ్య దేశాలు అభిప్రాయపడ్డాయి. ప్రపంచ వాణిజ్య సంస్థ (WTO) నిబంధనలకు విరుద్ధంగా ఉండే ఏకపక్ష చర్యలను వ్యతిరేకిస్తున్నట్లు ప్రకటనలో పేర్కొన్నారు.

6. ఉగ్రవాదంపై జీరో టాలరెన్స్

ఉగ్రవాదం, ఉగ్రవాదానికి నిధులు సమకూర్చడం, ఉగ్రవాదులకు సురక్షిత ఆశ్రయాలు కల్పించడం వంటి సవాళ్లను ఎదుర్కోవడానికి బ్రిక్స్ దేశాలు తమ నిబద్ధతను పునరుద్ఘాటించాయి. ఉగ్రవాదం ఏ రూపంలో ఉన్నా, ఏ పద్ధతిలో జరిగినా తీవ్రంగా ఖండిస్తున్నట్లు సభ్య దేశాలు స్పష్టం చేశాయి. ఉగ్రవాదంపై జీరో టాలరెన్స్ విధానాన్ని అనుసరించాలని పిలుపునిచ్చాయి.

7. పహల్గామ్ ఉగ్రదాడిని ఖండించిన బ్రిక్స్ దేశాలు

జమ్మూ కశ్మీర్‌లోని పహల్గామ్‌లో జరిగిన ఉగ్రవాద దాడిని బ్రిక్స్ ఉమ్మడి ప్రకటనలో సభ్య దేశాలు ఖండించాయి. ఉగ్రవాదుల జవాబుదారీతనాన్ని నిర్ధారించాలని, ఉగ్రవాదులు, ఉగ్ర సంస్థలపై కఠిన చర్యలు తీసుకోవాలని పిలుపునిచ్చాయి. ఉగ్రవాదానికి వ్యతిరేకంగా అంతర్జాతీయ సహకారం అవసరమని పేర్కొన్నాయి.

8. AI, సైబర్ స్పేస్, అంతరిక్ష సాంకేతికతపై మోడీ కీలక వ్యాఖ్యలు

బ్రిక్స్ సదస్సులో ప్రధాని నరేంద్ర మోడీ భవిష్యత్ సాంకేతికతలపై కీలక వ్యాఖ్యలు చేశారు. ఆర్టిఫిషియల్ ఇంటెలిజెన్స్ (AI), సైబర్ స్పేస్, ఔటర్ స్పేస్, బయోటెక్నాలజీ, క్రిటికల్ టెక్నాలజీలు ప్రపంచ భవిష్యత్తుకు అవకాశాలను సృష్టించడంతో పాటు అంతర్జాతీయ నియమాలను కూడా ప్రభావితం చేస్తున్నాయని అన్నారు. ఈ సాంకేతిక రంగాల్లో గ్లోబల్ సౌత్ దేశాలకు సమాన భాగస్వామ్యం ఉండాల్సిన అవసరం ఉందని ప్రధాని మోడీ స్పష్టం చేశారు.

9. ఏకపక్ష ఆర్థిక, సెకండరీ ఆంక్షలపై వ్యతిరేకత

బ్రిక్స్ ఉమ్మడి ప్రకటనలో ఏకపక్ష ఆర్థిక ఆంక్షలు, సెకండరీ ఆంక్షలను సభ్య దేశాలు ఖండించాయి. ఇటువంటి ఆంక్షలు అభివృద్ధి, ఆహార భద్రత, ఆరోగ్య సేవలు, మానవ హక్కులపై ప్రతికూల ప్రభావం చూపవచ్చని పేర్కొన్నారు. అంతర్జాతీయ ఆర్థిక వ్యవస్థలో సమానత్వం, న్యాయం, అభివృద్ధికి అనుకూలమైన విధానాలు అవసరమని బ్రిక్స్ దేశాలు అభిప్రాయపడ్డాయి.

10. మధ్యప్రాచ్య యుద్ధంపై జిన్‌పింగ్ ఆందోళన

బ్రిక్స్ సదస్సు సందర్భంగా చైనా అధ్యక్షుడు షీ జిన్‌పింగ్ మధ్యప్రాచ్యంలో కొనసాగుతున్న యుద్ధంపై ఆందోళన వ్యక్తం చేశారు. ఈ యుద్ధం ఆ ప్రాంత ప్రజలకు తీవ్ర నష్టాన్ని కలిగించిందని అన్నారు. మధ్యప్రాచ్యంలో కొనసాగుతున్న ఘర్షణ అంతర్జాతీయ సమాజం ఉమ్మడి ప్రయోజనాలకు అనుగుణంగా లేదని జిన్‌పింగ్ పేర్కొన్నారు. ప్రాంతీయ శాంతి, స్థిరత్వం కోసం అంతర్జాతీయ సహకారం అవసరమని తెలిపారు.

గాలా డిన్నర్‌తో ముగిసిన తొలి రోజు

బ్రిక్స్ సదస్సు తొలిరోజు చర్చలు, కీలక సమావేశాలతో పాటు నేతల కోసం ప్రత్యేక గాలా డిన్నర్ కూడా నిర్వహించారు. బ్రిక్స్ దేశాల నాయకులు ఈ కార్యక్రమంలో పాల్గొన్నారు. భారత్ నిర్వహించిన ఈ సదస్సు ద్వారా ప్రపంచ ఆర్థిక వ్యవస్థ, అంతర్జాతీయ భద్రత, సాంకేతికత, వాణిజ్యం, అభివృద్ధి వంటి అంశాలపై సభ్య దేశాల మధ్య చర్చలకు వేదిక ఏర్పడింది.