Varun Tej Love Story: మెగా ప్రిన్స్ వరుణ్ తేజ్, హీరోయిన్ లావణ్య త్రిపాఠి ప్రేమ ప్రయాణం గురించి తెలిసిందే. అయితే ఈ ప్రేమకథ చాలా కాలం పాటు ఎవరికీ తెలియకుండా సీక్రెట్గా కొనసాగింది. తాజాగా ఓ ఇంటర్వ్యూలో వరుణ్ తేజ్ తమ ప్రేమ, వివాహం గురించి ఆసక్తికర విషయాలను పంచుకున్నారు. వరుణ్ తేజ్ – లావణ్య త్రిపాఠి పరిచయం 2017లో ‘మిస్టర్’ సినిమా సెట్స్లో మొదలైంది. ఆ సమయంలో ఏర్పడిన స్నేహం క్రమంగా ప్రేమగా మారింది. అయితే తమ వ్యక్తిగత జీవితాన్ని ప్రైవేట్గా ఉంచుకోవాలనే ఉద్దేశంతో ఇద్దరూ ఈ విషయాన్ని బయటకు చెప్పకుండా జాగ్రత్త పడ్డారు. దాదాపు ఏడేళ్ల పాటు తమ రిలేషన్షిప్ను గోప్యంగా కొనసాగించిన ఈ జంట.. చివరకు 2023లో తమ ప్రేమ విషయాన్ని అధికారికంగా ప్రకటించింది. అదే ఏడాది జూన్ 8న ఎంగేజ్మెంట్ చేసుకున్న వరుణ్ తేజ్ – లావణ్య త్రిపాఠి.. ఆ తర్వాత నవంబర్ 1న ఇటలీలో వివాహ బంధంతో ఒక్కటయ్యారు.
తమ రిలేషన్షిప్ను ఎందుకు రహస్యంగా ఉంచారనే విషయంపై తాజాగా ఒక ఇంటర్వ్యూలో వరుణ్ తేజ్ మాట్లాడుతూ.. వ్యక్తిగత జీవితంలోకి ఇతరుల జోక్యం ఎక్కువగా ఉండకూడదనే ఉద్దేశంతోనే తాము ఈ నిర్ణయం తీసుకున్నామని వెల్లడించారు. ఒకసారి విషయం బయటకు వస్తే అనవసరమైన చర్చలు, ఊహాగానాలు తమపై ప్రభావం చూపే అవకాశం ఉందని భావించామని చెప్పారు. తమ బంధంపై నమ్మకం వచ్చిన తర్వాతే కుటుంబ సభ్యులకు విషయాన్ని చెప్పామని వరుణ్ వెల్లడించారు. మొదట తన తల్లికి ఈ విషయం చెప్పినట్లు గుర్తు చేసుకున్నారు. కుటుంబ సభ్యులు కూడా తమ నిర్ణయాన్ని అర్థం చేసుకుని తమకు మద్దతు ఇచ్చారని అన్నారు. ప్రస్తుతం వరుణ్ తేజ్ – లావణ్య త్రిపాఠి దంపతులు తమ వైవాహిక జీవితాన్ని ఆస్వాదిస్తున్నారు. ఈ దంపతులకు ఒక కుమారుడు ఉన్నారు.