దుల్కర్ సల్మాన్ మూవీ టైటిల్ మారింది!

పాపులర్ తెలుగు సినిమాల టైటిల్స్ ను డబ్బింగ్ సినిమాలకు ఉపయోగించడం మామూలే! ఆ మధ్య కార్తీ సినిమాకు ‘ఖైదీ’ అనే పేరు పెట్టారు. అలానే దుల్కార్ సల్మాన్ నటించిన మలయాళ చిత్రం ‘వరణే అవశ్యముంద్’ ను తెలుగులో డబ్ చేస్తూ నిర్మాతలు ‘వరుడు కావాలి’ అనే టైటిల్ పెట్టారు. ఈ నెల 24న ఆహాలో ఈ మూవీని స్ట్రీమింగ్ చేస్తున్నట్టూ ప్రకటించారు. అయితే… ఇప్పటికే తెలుగులో నాగశౌర్య, రీతువర్మ జంటగా సితార ఎంటర్ టైన్ మెంట్స్ ‘వరుడు కావలెను’ మూవీని నిర్మిస్తోంది. అతి త్వరలో ఇది కూడా జనం ముందుకు రాబోతోంది. ఈ నేపథ్యంలో దుల్కర్ సల్మాన్ మూవీ ‘వరుడు కావాలి’ ఓటీటీ లోనే రిలీజ్ అవుతున్నా ప్రేక్షకులు కన్ఫ్యూజన్ కు గురయ్యే ఆస్కారం ఉంది. బహుశా అందుకే కావచ్చు… ‘వరుడు కావాలి’కి సంబంధించిన ప్రకటన వచ్చిన మర్నాడే ఈ మూవీ పేరును ‘పరిణయం’గా మార్చి కొత్త పోస్టర్ ను రిలీజ్ చేశారు. సో… ఆహాలో ఈ నెల 24న దుల్కర్ సల్మాన్, కళ్యాణీ ప్రియదర్శన్ జంటగా నటించిన ఈ మూవీ స్ట్రీమింగ్ కాబోతోంది.

మరో విశేషం ఏమంటే.. 2020 వాలెంటైన్స్ డే సందర్భంగా ‘వరణే అవశ్యముంద్’ చిత్రం ఫిబ్రవరి 7న విడుదలైంది. దీనికి హీరో దుల్కర్ సల్మానే నిర్మాత కూడా కావడం విశేషం. ఈ రొమాంటిక్ కామెడీ డ్రామాతో అనూప్ సత్యన్ దర్శకుడిగా పరిచయమయ్యాడు. ఇక ఐదేళ్ళ గ్యాప్ తర్వాత ఈ మూవీతోనే సురేశ్ గోపీ నటుడిగా రీ-ఎంట్రీ ఇచ్చాడు. అలానే సురేశ్ గోపీ, శోభన జంట 15 యేళ్ళ విరామం తర్వాత ఈ మూవీలో మరోసారి జోడీ కట్టడం మరో విశేషం.