Varanasi: ‘వారణాసి’పై జక్కన్న మరో క్రేజీ ప్లాన్‌.. షూటింగ్ వెనుక సీక్రెట్స్ అన్నీ బయట పెడతాడట?

Varanasi: సూపర్‌స్టార్ మహేశ్‌బాబు, దర్శకధీరుడు ఎస్‌.ఎస్‌.రాజమౌళి కాంబినేషన్‌లో అత్యంత ప్రతిష్ఠాత్మకంగా తెరకెక్కుతున్న చిత్రం ‘వారణాసి’. ఈ చిత్రంపై సాధారణ ప్రేక్షకులతో పాటు ట్రేడ్ వర్గాల్లోనూ రోజురోజుకూ అంచనాలు పెరుగుతున్నాయి. అంతర్జాతీయ స్థాయిలో భారీ స్కేల్‌లో రూపొందుతున్న ఈ సినిమా మేకింగ్‌ వెనుక ఉన్న ఆసక్తికర విషయాలను ప్రేక్షకులకు చూపించేందుకు ప్రత్యేకంగా ఓ డాక్యుమెంటరీని రూపొందిస్తున్నట్లు సమాచారం. ‘వారణాసి’ కోసం భారీ యాక్షన్‌ సన్నివేశాలు, గ్రాండ్‌ సెట్స్‌తో పాటు అత్యాధునిక సాంకేతికతను మేకర్స్ వినియోగిస్తున్నట్లు తెలుస్తోంది. ముఖ్యంగా రియల్‌ యానిమల్స్‌తో చిత్రీకరిస్తున్న క్లిష్టమైన సన్నివేశాల కోసం చిత్రబృందం చేస్తున్న కృషి కూడా ఈ మేకింగ్‌ డాక్యుమెంటరీలో చూపించనున్నట్లు టాక్. షూటింగ్‌ టైంలో చోటుచేసుకున్న ఆసక్తికర ఘటనలు, భారీ సన్నివేశాల రూపకల్పన, నటీనటులు, సాంకేతిక నిపుణుల శ్రమ వంటి అంశాలను ఈ డాక్యుమెంటరీలో పొందుపరిచే అవకాశం ఉందట.

ఈ డాక్యుమెంటరీకి ప్రముఖ డాక్యుమెంటరీ డైరెక్టర్ గోగితా చిక్వైడ్జే పనిచేస్తున్నట్లు IMDbలోని వివరాల ఆధారంగా వార్తలు వెలువడ్డాయి. అయితే దీనిపై ‘వారణాసి’ చిత్రబృందం నుంచి అధికారిక ప్రకటన రావాల్సి ఉంది. అంతర్జాతీయ స్థాయి నిర్మాణ ప్రక్రియను ప్రేక్షకులకు పరిచయం చేసేలా ఈ డాక్యుమెంటరీని రూపొందిస్తున్నట్లు తెలుస్తోంది. కేవలం సినిమా రిలీజ్ సమయంలోనే కాకుండా.. ప్రమోషనల్‌ కంటెంట్‌గా లేదా మూవీ రిలీజ్‌ తర్వాత ప్రత్యేక ఫీచర్‌గా ఈ డాక్యుమెంటరీని ప్రేక్షకుల ముందుకు తీసుకొచ్చే ఆలోచనలో మేకర్స్‌ ఉన్నట్లు టాక్. ఈ సినిమా వెనుక పనిచేస్తున్న నటీనటులు, సాంకేతిక నిపుణుల కృషిని ప్రేక్షకులకు మరింత దగ్గరగా చూపించడమే దీని ప్రధాన ఉద్దేశంగా తెలుస్తోంది. మహేశ్‌బాబు–జక్కన్న కాంబినేషన్‌లో తెరకెక్కుతున్న తొలి సినిమా కావడంతో ‘వారణాసి’పై ఇప్పటికే భారీ క్రేజ్‌ నెలకొంది. ఇప్పుడు ఈ సినిమా మేకింగ్‌పైనే ప్రత్యేక డాక్యుమెంటరీ రూపొందిస్తున్నారనే వార్త ఈ ప్రాజెక్ట్‌పై ఆసక్తిని మరింత పెంచుతోంది. అయితే ఈ డాక్యుమెంటరీకి సంబంధించిన పూర్తి వివరాలు అధికారికంగా తెలియాల్సి ఉంది.