Third eye: అమెరికాలో జరిగిన యదార్థ సంఘటన ఆధారంగా తెరకెక్కుతున్న సినిమా ‘మూడో కన్ను’. ఈ ఆంథాలజీ మూవీకి నలుగురు దర్శకత్వం వహిస్తున్నారు. వాళ్ళే సూరత్ రాంబాబు, కె. బ్రహ్మయ్య ఆచార్య, కృష్ణమోహన్, మావిటి సాయి సురేంద్రబాబు. దీన్ని సునీత రాజేందర్, ‘ప్లాన్ బి’ డైరెక్టర్ కె. వి. రాజమహి నిర్మిస్తున్నారు. నాలుగు కథలను, నలుగురు దర్శకులు తెరకెక్కిస్తున్న ఈ మూవీ గురించి సీనియర్ నటుడు సాయికుమార్ మాట్లాడుతూ, “కొత్త కథతో వస్తున్న కొత్తవాళ్లను ఎంకరేజ్ చేయడానికి ఈ సినిమా చేస్తున్నాను” అని అన్నారు. ఈ సినిమా అత్యంత ఉత్కంఠ భరితంగా ఉంటుందని మరో నటుడు శ్రీనివాస రెడ్డి తెలిపాడు.
తెలుగు ఫిలిం డైరెక్టర్స్ అసోసియేషన్ అధ్యక్షుడు కాశీ విశ్వనాథ్ మాట్లాడుతూ, “ఫస్ట్ టైం తెలుగు సినిమా చరిత్రలో మా యూనియన్ లో మెంబర్ షిప్ ఉన్న నలుగురు కొత్త దర్శకులను పరిచయం చేస్తున్న మా సభ్యుడు, దర్శకుడు కె. వి. రాజమహికి ధన్యవాదాలు. ఈ చిత్రంలో నేను కూడా భాగమైనందుకు ఆనందంగా ఉంది” అని అన్నారు. చిత్ర నిర్మాతలు మాట్లాడుతూ, “సస్పెన్స్ క్రైమ్ థ్రిల్లర్ అంశాలతో ఈ ఆంథాలజీని నిర్మించాం. కొత్త కాన్సెప్ట్, కొత్త టాలెంట్ తో వస్తున్న ఈ మూవీని అందరూ ఆదరిస్తారనే నమ్మకం ఉంది. ఇటీవలే సినిమా షూటింగ్ ను పూర్తి చేశాం. ప్రస్తుతం పోస్ట్ ప్రొడక్షన్ వర్క్ జరుగుతోంది. ఏప్రిల్ లో సినిమాను విడుదల చేస్తాం” అని చెప్పారు. ఇందులో నిరోష, సూర్య, నాగ మహేష్ వడ్డి, నిరోష, కౌశిక్ రెడ్డి, ప్రదీప్ రుద్ర, దయానంద రెడ్డి, శశిధర్ కౌసరి, దేవి ప్రసాద్, మాధవి లత, ‘చిత్రం’ శ్రీను, సత్య శ్రీ, మధు, దివ్య, వీరశంకర్, రూప తదితరులు నటిస్తున్నారు.
