Biker: శర్వా ‘బైకర్’ జోరు.. తొలి వీకెండ్ లోనే రూ. 18 కోట్ల వసూళ్లు!

శర్వానంద్ ఈ వేసవిలో బాక్సాఫీస్ వద్ద అదిరిపోయే బోణీ కొట్టారు. భారీ అంచనాల మధ్య విడుదలైన హై-ఆక్టేన్ స్పోర్ట్స్ డ్రామా ‘బైకర్’ ప్రేక్షకులను విశేషంగా ఆకట్టుకుంటోంది. అభిలాష్ రెడ్డి దర్శకత్వంలో, యూవీ క్రియేషన్స్ నిర్మించిన ఈ చిత్రం విడుదలైన మొదటి మూడు రోజుల్లోనే ప్రపంచవ్యాప్తంగా రూ. 18.09 కోట్ల గ్రాస్ వసూలు చేసి ట్రేడ్ వర్గాలను సైతం ఆశ్చర్యపరిచింది. సాధారణంగా సినిమాలకు మొదటి రోజు భారీ వసూళ్లు రావడం సహజం, కానీ ‘బైకర్’ విషయంలో ఒక అరుదైన ట్రెండ్ కనిపిస్తోంది. శుక్రవారం మంచి ఓపెనింగ్స్ రాబట్టిన ఈ సినిమా, శనివారం నాటికి పుంజుకుని, ఆదివారం నాడు అత్యధిక వసూళ్లతో కెరీర్ బెస్ట్ రన్ కొనసాగించింది. మౌత్ టాక్ బాగుండటంతో థియేటర్ల వద్ద జనం క్యూ కడుతున్నారు.

Also Read:Rakasa: దూసుకుపోతున్న రాకాస.. మూడు రోజుల్లో షాకింగ్ కలెక్షన్స్

సీనియర్ హీరో రాజశేఖర్, శర్వానంద్ మధ్య సాగే ఎమోషనల్ సీన్లు ఫ్యామిలీ ఆడియన్స్‌ను కట్టిపడేస్తున్నాయి. అడ్రినాలిన్ పెంచే రేసింగ్ సన్నివేశాలు యువతను థియేటర్ల వైపు పరుగులు పెట్టిస్తున్నాయి. ఎమోషన్, ఎంటర్‌టైన్‌మెంట్‌ను సరైన మోతాదులో కలిపిన దర్శకుడి ప్రతిభకు ప్రేక్షకులు ఫిదా అవుతున్నారు. ఈ సినిమా కోసం శర్వానంద్ చేసిన శారీరక మార్పులు, ఆయన కనబరిచిన అంకితభావం స్క్రీన్‌పై స్పష్టంగా కనిపిస్తోంది. అందుకే ప్రేక్షకులు కూడా ఈ సినిమాకు బ్రహ్మరథం పడుతున్నారు. సినిమా యూనిట్ చేస్తున్న అగ్రెసివ్ ప్రమోషన్లు కూడా కలెక్షన్లు పెరగడానికి దోహదపడుతున్నాయి.