Shah Rukh Khan: ‘నా భర్త కంటే మీరే ఇష్టం’.. మహిళా అభిమాని మాటకు షారుఖ్ ఇచ్చిన సమాధానం వైరల్

Shah Rukh Khan : మిలియన్ల కొద్దీ అభిమానులను సంపాదించుకోవడం ఒక గొప్ప విషయం అయితే, వారితో ఆప్యాయంగా మెలగడం, వారి ప్రేమకు గౌరవం ఇవ్వడం మరో గొప్ప లక్షణం. బాలీవుడ్ బాద్‌షా షారుఖ్ ఖాన్ మరోసారి అదే నిరూపించారు. కర్ణాటకలోని మంగళూరులో జరిగిన ఓ ప్రత్యేక కార్యక్రమంలో పాల్గొన్న ఆయన, తన స్టేజ్ ప్రెజెన్స్‌తోనే కాదు, అభిమానులతో చేసిన సరదా సంభాషణతో కూడా అందరి మనసులు గెలుచుకున్నారు. ముఖ్యంగా ఓ మహిళా అభిమాని చేసిన వ్యాఖ్యకు షారుఖ్ ఇచ్చిన సమాధానం ఇప్పుడు సోషల్ మీడియాలో వైరల్‌గా మారింది.

జూన్ 25న రోహన్ కార్పొరేషన్ నిర్వహించిన ఒక ప్రత్యేక కార్యక్రమం కోసం మంగళూరుకు విచ్చేశారు షారుఖ్. ఈ కార్యక్రమానికి వేలాది మంది అభిమానులు హాజరయ్యారు. షారుఖ్ ఖాన్ బ్లాక్ దుస్తుల్లో, స్టైలిష్ సన్‌గ్లాసెస్‌తో వేదికపైకి అడుగుపెట్టగానే అభిమానుల కేరింతలతో ఆ ప్రాంగణం మార్మోగిపోయింది. ఆయనను ఒక్కసారి ప్రత్యక్షంగా చూడాలనే ఉద్దేశంతో పలువురు అభిమానులు వివిధ ప్రాంతాల నుంచి ప్రత్యేకంగా మంగళూరుకు చేరుకున్నారు. వేదికపైకి వచ్చిన వెంటనే షారుఖ్ కన్నడలో “నమస్కారం” అంటూ ప్రేక్షకులను పలకరించడం అందరినీ ఆకట్టుకుంది. అనంతరం మంగళూరు ప్రజలు చూపించిన ప్రేమాభిమానాలకు కృతజ్ఞతలు తెలిపారు. విమానాశ్రయం నుంచి కార్యక్రమం జరిగే వేదిక వరకు ప్రజలు చూపించిన ఆత్మీయ స్వాగతం తనను ఎంతో ఆనందపరిచిందని చెప్పారు. తాను ఊహించిన దానికంటే ఎంతో గొప్ప ఆదరణ లభించిందని పేర్కొన్నారు.

అయితే ఈ కార్యక్రమంలో అభిమానులతో ముఖాముఖి నిర్వహించిన సమయంలో ఓ ఆసక్తికర సంఘటన చోటుచేసుకుంది. ఒక మహిళా అభిమాని “నేను నా భర్త కంటే మిమ్మల్నే ఎక్కువగా ప్రేమిస్తున్నాను” అని చెప్పింది. ఆ మాట విన్న షారుఖ్ ఏమాత్రం తడబడకుండా చిరునవ్వుతో ఇలాంటి విషయాలు ఒంటరిగా చెప్పాలి కదా అంటూ సరదాగా స్పందించారు. ఆయన చమత్కారానికి అక్కడున్న వారంతా నవ్వుల్లో మునిగిపోయారు. అంతటితో ఆగకుండా వెంటనే పరిస్థితిని మరింత ఉల్లాసంగా మార్చిన షారుఖ్, “మీ భావాలు నాకు అర్థమయ్యాయి. మీ భర్తకు కూడా అవి అర్థమయ్యాయని నేను నమ్ముతున్నాను, మీ అందరినీ ప్రేమిస్తున్నాను, మీ భర్తను కూడా ప్రేమిస్తున్నాను, మీ కుటుంబానికి కూడా నా ప్రేమ” అంటూ చెప్పడంతో అభిమానులు మరోసారి చప్పట్లతో అభినందించారు. ఈ సమాధానం ఆయన హాస్యచతురతతో పాటు అభిమానుల పట్ల ఉన్న గౌరవాన్ని కూడా ప్రతిబింబించిందని నెటిజన్లు ప్రశంసిస్తున్నారు.

ఈ సంభాషణకు సంబంధించిన వీడియోలు, క్లిప్‌లు సోషల్ మీడియాలో వేగంగా వైరల్ అవుతున్నాయి. షారుఖ్ సమయస్పూర్తితో స్పందించే తీరు అందరినీ ఆకట్టుకుంది. ఆయన ఎక్కడికి వెళ్లినా స్టార్ హీరోగా మాత్రమే కాకుండా, అభిమానులతో సన్నిహితంగా మెలిగే వ్యక్తిగా గుర్తింపు పొందుతున్నారు. బ్లాక్‌బస్టర్ సినిమాలతో ప్రపంచవ్యాప్తంగా అభిమానులను సంపాదించుకున్న షారుఖ్ ఖాన్, ఇలాంటి చిన్న చిన్న క్షణాలతో కూడా ప్రజల హృదయాల్లో తన స్థానాన్ని మరింత బలపరుచుకుంటున్నారు. మంగళూరు పర్యటన కూడా అదే విషయాన్ని మరోసారి నిరూపించింది. సినిమా తెరపై తన నటనతో అలరించే షారుఖ్, నిజ జీవితంలో కూడా తన సరదా స్వభావం, వినయంతో అభిమానుల ప్రేమను మరింత గెలుచుకుంటూనే ఉన్నారు.

SRK Fangirl: I love you more than my husband 😍#ShahRukhKhan: Ye akele me batana tha, public me nahi 😂 pic.twitter.com/Pp3wjKFfFL

— $@M (@SAMTHEBESTEST_) June 26, 2026