Tilak Varma: మ్యాచ్ గెలిచిన తర్వాత వర్మ వినూత్న సెలబ్రేషన్స్.. కౌంటర్ మాములుగా ఇవ్వలేదుగా..

క్రైస్ట్‌చర్చ్ వేదికగా న్యూజిలాండ్‌తో జరిగిన రెండో టీ20లో టీమిండియా నాలుగు వికెట్ల తేడాతో అద్భుత విజయం సాధించి, ఐదు మ్యాచ్‌ల సిరీస్‌లో 2-0 ఆధిక్యంలో నిలిచింది. తొలి మ్యాచ్‌లో విఫలమయ్యాడనే విమర్శలు ఎదుర్కొన్న వైస్ కెప్టెన్ తిలక్ వర్మ, ఈ పోరులో తన బ్యాట్‌తోనే సమాధానం చెప్పాడు. ఒత్తిడిలో ఉన్న జట్టును విజయతీరాలకు చేర్చి తనపై వస్తున్న విమర్శలకు చెక్ పెట్టాడు.

ఈ మ్యాచ్‌లో ఆరంభంలో భారత బ్యాటర్లు త్వరత్వరగా పెవిలియన్ చేరడంతో జట్టు పీకల్లోతు కష్టాల్లో పడింది. గత మ్యాచ్‌లో ఆశించిన స్థాయిలో రాణించలేకపోవడంతో తిలక్ వర్మపై సోషల్ మీడియాలో తీవ్ర విమర్శలు వచ్చాయి. అయితే ఈసారి తనకి సరిపోయే ఆరో స్థానంలో బ్యాటింగ్‌కు దిగిన తిలక్, ఏ మాత్రం తడబడకుండా అద్భుతమైన ఇన్నింగ్స్ ఆడాడు. ప్రత్యర్థి బౌలర్లను సమర్థవంతంగా ఎదుర్కొంటూ కేవలం 26 బంతుల్లోనే అజేయంగా 51 పరుగులు సాధించాడు.

You know it’s clutch when @TilakV9 pulls out this celebration 🥶

#TeamIndia | #NZvIND https://t.co/WJTeZB1xzZ

— BCCI (@BCCI) October 24, 2026

తన ఇన్నింగ్స్‌లో ఆరు ఆకర్షణీయమైన ఫోర్లు, ఒక సిక్సర్ బాది జట్టును గెలిపించాడు. నితీశ్ కుమార్ రెడ్డితో కలిసి ఏడో వికెట్‌కు అజేయంగా అరవై తొమ్మిది పరుగుల భాగస్వామ్యాన్ని నెలకొల్పి చిరస్మరణీయ విజయాన్ని అందించాడు. మ్యాచ్ ముగిసిన తర్వాత తిలక్ వర్మ తన పెదవులపై వేలు ఉంచుతూ, చెవులను మూసుకునే సంజ్ఞలతో ప్రత్యేకంగా సెలబ్రేషన్స్ చేసుకున్నాడు. ఈ వినూత్న వేడుక తొలి మ్యాచ్ విమర్శకులకు అతడు ఇచ్చిన కౌంటర్‌గా చర్చనీయాంశమైంది. ఈ విజయంతో తిలక్ తన ఫామ్‌ను నిరూపించుకోవడంతో పాటు జట్టు విజయంలో కీలక పాత్ర పోషించాడు.