Ravi Teja New Movie Update : మాస్ మహరాజ్ ను లైన్లో పెట్టిన ‘సింగం’ డైరెక్టర్… ‘ఇరుముడి’ తర్వాత ఇదే ప్రాజెక్ట్ ?

Ravi Teja New Movie Update : ‘ఇరుముడి’తో ప్రేక్షకుల ముందుకు రావడానికి సిద్ధమవుతున్న రవితేజ, మరో ఆసక్తికరమైన ప్రాజెక్ట్‌కు గ్రీన్ సిగ్నల్ ఇచ్చినట్లు వార్తలు వినిపిస్తున్నాయి. తమిళంలో ‘సింగం’ ఫ్రాంచైజీతో దర్శకుడు హరితో ఆయన చేతులు కలపనున్నారనే ప్రచారం హాట్ టాపిక్‌గా మారింది. రీసెంట్ గా దర్శకుడు హరి ఇటీవల రవితేజను కలిసి ఒక లైన్ స్టోరీ వినిపించారని తెలుస్తోంది. కథ రవితేజకు నచ్చిందని, ఈ ప్రాజెక్ట్ ముందుకు వెళ్లే అవకాశం ఉందని ప్రచారం జరుగుతోంది. వేగవంతమైన కథనం, మాస్ యాక్షన్, ఎమోషనల్ డ్రామాను కలిపి ప్రేక్షకులను ఆకట్టుకునే హరి స్టైల్‌కు రవితేజ ఎనర్జీ జత అయితే అది మరో పవర్‌ఫుల్ కమర్షియల్ ఎంటర్‌టైనర్‌గా మారే అవకాశాలు కనిపిస్తున్నాయి. అయితే ఇప్పటివరకు ఈ వార్తపై రవితేజ గానీ, దర్శకుడు హరి గానీ అధికారికంగా స్పందించలేదు. ప్రస్తుతం ఇది ఇంకా చర్చల దశలోనే ఉంది.

రవితేజ ఇప్పుడు పూర్తిగా ‘ఇరుముడి’ చిత్రంపైనే దృష్టి పెట్టాడు. 2026 ఆగస్టు 21న విడుదల కానున్న ఈ సినిమా ఆయన కెరీర్‌లో కీలక చిత్రంగా మారుతుందని అభిమానులు ఆశిస్తున్నారు. ఇటీవల విడుదలైన గ్లింప్స్‌లో రవితేజ ఒక తండ్రి పాత్రలో కనిపించారు. తన కూతురి కోసం ఏదైనా చేయడానికి సిద్ధపడే వ్యక్తిగా ఆయన పాత్రను చూపించిన తీరు ప్రేక్షకులను ఆకట్టుకుంది. గత కొన్ని సినిమాలు ఆశించిన స్థాయిలో బాక్సాఫీస్ విజయాలు సాధించకపోవడంతో ‘ఇరుముడి’పై రవితేజ కూడా ఎక్కవ ఆశలు పెట్టుకున్నారు. ఈ చిత్రంలో ప్రియా భవానీ శంకర్, బేబీ నక్షత్ర కీలక పాత్రల్లో నటిస్తున్నారు. సాయి కుమార్, అజయ్ ఘోష్, రమేష్ ఇందిర, స్వాసిక, మీసాల లక్ష్మణ్, రాజ్‌కుమార్ కసిరెడ్డి, రమణ భార్గవ్, కిషోర్ కంచెరపాలెం, కార్తీక్ అడుసుమల్లి వంటి నటీనటులు కూడా ఉన్నారు.

రవితేజ చివరిగా ‘భర్త మహాసయులకు విజ్ఞప్తి’ అనే రొమాంటిక్ కామెడీ చిత్రంలో కనిపించారు. ఈ సినిమా ప్రస్తుతం ZEE5 ఓటీటీలో అందుబాటులో ఉంది. ఇప్పుడు అభిమానుల దృష్టి పూర్తిగా ‘ఇరుముడి’పై ఉంది. అదే సమయంలో హరితో కాంబినేషన్ నిజమైతే, మాస్ యాక్షన్ సినిమాలను ఇష్టపడే ప్రేక్షకులకు అది మరో భారీ సర్‌ప్రైజ్‌గా మారే అవకాశాలు కనిపిస్తున్నాయి. రవితేజ ఎనర్జీకి హరి మాస్ టచ్ కలిస్తే తెరపై ఎలాంటి సంచలనం సృష్టిస్తారో చూడాలంటే అధికారిక ప్రకటన వచ్చే వరకు వేచి చూడాల్సిందే.