Ramayana: ‘టాక్సిక్’ తర్వాత మరో భారీ పందెం.. ‘రామాయణం’పై దిల్ రాజు కన్ను? రూ.105 కోట్ల డీల్!

Ramayana: టాలీవుడ్‌లో భారీ సినిమాల బిజినెస్ విషయంలో నిర్మాత దిల్ రాజు వ్యూహం ఎప్పుడూ ఆసక్తికరంగానే ఉంటుంది. ఒకవైపు యష్ నటించిన ‘టాక్సిక్’ వంటి భారీ పాన్ ఇండియా మూవీపై తెలుగు రైట్స్ కోసం భారీ పెట్టుబడి పెట్టిన ఆయన.. ఇప్పుడు మరో ప్రతిష్టాత్మక ప్రాజెక్ట్‌పై కన్నేసినట్లు వార్తలు రావడం సినీ వర్గాల్లో హాట్ టాపిక్‌గా మారింది. అది కూడా భారతీయ పురాణ గాథ ఆధారంగా తెరకెక్కుతున్న ‘రామాయణం’ కావడంతో ఈ చర్చకు మరింత ప్రాధాన్యత ఏర్పడింది. తెలుగు రాష్ట్రాల థియేట్రికల్ మార్కెట్‌లో భారీ స్థాయిలో వసూళ్లు సాధించే సామర్థ్యం ఉన్న సినిమాలపై దిల్ రాజు మరోసారి పెద్ద పందెం వేయబోతున్నారా అనే ఆసక్తి మొదలైంది.

కన్నడ స్టార్ హీరో యష్ నటిస్తున్న ‘టాక్సిక్’ (Toxic) సినిమా తెలుగు రైట్స్  వెనుక కూడా పెద్ద బిజినెస్ స్ట్రాటజీనే నడిచింది. సాధారణంగా ఏదైనా సినిమా కొన్నప్పుడు లాభనష్టాలు కొనుగోలుదారుడికే చెందుతాయి. కానీ ఇక్కడ దిల్ రాజు నిర్మాతలతో ‘వాపసు ప్రాతిపదికన’ (Refundable Basis) ఒప్పందం చేసుకున్నారు. అంటే సినిమా ఆశించిన స్థాయిలో ఆడకపోతే దిల్ రాజు పెట్టిన పెట్టుబడిని నిర్మాతలు తిరిగి చెల్లించాల్సి ఉంటుంది. దీనివల్ల ఆయనకు నష్టపోయే ప్రమాదం (Risk) పూర్తిగా తగ్గిపోతుంది. మొదట ఈ డీల్ విలువ రూ. 108 కోట్లుగా ప్రచారం జరిగినప్పటికీ, తరువాత ఆ డీల్ రూ. 75 కోట్లకు జరిగినట్లు తెలుస్తోంది. రేటు ఇలా భారీగా తగ్గడం, రీఫండబుల్ అగ్రిమెంట్ ఉండటం వల్ల, సినిమా నెగిటివ్ టాక్ తెచ్చుకున్నప్పటికి దిల్ రాజు సేఫ్ జోన్‌లోకి వెళ్లారనే వార్తలు కూడా వస్తున్నాయి.

ఇలాంటి పరిస్థితుల్లో ఇప్పుడు ‘రామాయణం’ తెలుగు రాష్ట్రాల థియేట్రికల్ రైట్స్ కోసం దిల్ రాజు ఆసక్తి చూపుతున్నారనే వార్తలు మరోసారి ఆసక్తిని పెంచుతున్నాయి. ఈ సినిమా హక్కుల కోసం సుమారు రూ.105 కోట్లకు రీఫండబుల్ పద్ధతిలో చర్చలు జరుగుతున్నట్లు సమాచారం.  అయితే ఇది ఇంకా చర్చల దశలో ఉన్నట్లు తెలుస్తోంది. ‘రామాయణం’ వంటి భారీ పాన్ ఇండియా ప్రాజెక్ట్‌కు తెలుగు మార్కెట్‌లో ఉన్న అవకాశాలను చూస్తే దిల్ రాజు ఆసక్తి వెనుక కారణం అర్థమవుతుంది. రామాయణం భారతీయ ప్రేక్షకులకు ఎంతో పరిచయమైన కథ. ముఖ్యంగా తెలుగు రాష్ట్రాల్లో పౌరాణిక కథలకు ఉన్న ప్రత్యేకమైన ప్రేక్షకాదరణ కూడా ఈ సినిమా రైట్స్ కోసం దిల్ రాజు ఆసక్తి చూపిస్తున్నట్లు ఒక కారణం కూడా కావచ్చు.

అయితే రూ.105 కోట్ల స్థాయిలో హక్కులు తీసుకోవడం సాధారణ నిర్ణయం కాదు. సినిమా థియేట్రికల్ బిజినెస్‌లో ఇలాంటి భారీ మొత్తాలు పెట్టుబడి పెట్టినప్పుడు టికెట్ ధరలు, థియేటర్ల సంఖ్య, ఆక్యుపెన్సీ, సినిమాకు వచ్చే టాక్, పోటీగా విడుదలయ్యే ఇతర సినిమాలు వంటి అనేక అంశాలు ప్రభావం చూపుతాయి. అందుకే రీఫండబుల్ పద్ధతిలో డీల్ చేయడం ద్వారా రిస్క్‌ను కొంత నియంత్రించుకునే ప్రయత్నం జరుగుతున్నట్లు కనిపిస్తోంది. ఇక ‘టాక్సిక్’ తర్వాత ‘రామాయణం’పై కూడా దిల్ రాజు భారీ మొత్తాన్ని పందెంగా పెట్టేందుకు సిద్ధమవుతున్నారనే వార్త నిజమైతే.. ఇది తెలుగు సినిమా మార్కెట్‌పై ఆయనకు ఉన్న నమ్మకాన్ని మరోసారి చూపించినట్లే అవుతుంది. కేవలం తెలుగు హీరోల సినిమాలకే కాకుండా భారీ పాన్ ఇండియా ప్రాజెక్ట్‌లకు కూడా తెలుగు రాష్ట్రాల్లో విపరీతమైన మార్కెట్ ఉందని ఆయన బిజినెస్ స్ట్రాటజీ సూచిస్తోంది.

అయితే ‘రామాయణం’ హక్కుల విషయంలో దిల్ రాజు చివరకు ఎలాంటి నిర్ణయం తీసుకుంటారనేది ఇప్పుడు కీలకంగా మారింది. రూ.105 కోట్ల డీల్ నిజంగానే ఫైనల్ అవుతుందా, లేక చర్చల దశలోనే ఆగిపోతుందా అనేది ఆఫీషియల్ గా సమాచారం వచ్చిన తర్వాతే స్పష్టమవుతుంది. ఒకవేళ ఈ ఒప్పందం ఖరారైతే మాత్రం ‘టాక్సిక్’ తర్వాత దిల్ రాజు చేస్తున్న మరో భారీ థియేట్రికల్ బెట్టింగ్‌గా ఇది ట్రేడ్ వర్గాల్లో చర్చనీయాంశంగా మారడం ఖాయం.