గ్లోబల్ స్టార్ రామ్ చరణ్ నటిస్తున్న రూరల్ స్పోర్ట్స్ డ్రామా ‘పెద్ది’ కోసం చిత్ర యూనిట్ ప్రాణం పెట్టి పనిచేస్తోంది. ఈ సినిమా అవుట్పుట్ పట్ల చిత్ర బృందం ఎంత ధీమాగా ఉందో తాజాగా అనంత శ్రీరామ్ మాటలు వింటే అర్థమవుతుంది. ఈ చిత్రానికి సాహిత్యం అందిస్తున్న ఆయన, సినిమా చూస్తున్నప్పుడు ప్రేక్షకులకు కలిగే అనుభూతిని గురించి ఇంట్రస్టింగ్ కామెంట్స్ చేశారు..
అనంత శ్రీరామ్ మాట్లాడుతూ.. ‘పెద్ది కేవలం ఒక సినిమా మాత్రమే కాదు, అది ఒక అద్భుతమైన దృశ్య కావ్యం. సినిమా చూస్తున్నంత సేపు రామ్ చరణ్ అనే స్టార్ హీరో ఎక్కడా కనిపించడు, కేవలం ‘పెద్ది’ అనే పాత్ర మాత్రమే కనిపిస్తుంది. ఆ పాత్రలో చరణ్ అంతలా ఒదిగిపోయారు. అంతేకాకుండా, థియేటర్ నుండి బయటకు వచ్చాక కూడా ఈ సినిమా ప్రభావం ప్రేక్షకుడిపై నాలుగైదు రోజుల పాటు ఉంటుంది, ఆ జ్ఞాపకాలు వెంటాడుతూనే ఉంటాయి’ అని ఆయన పేర్కొన్నారు. ఇది చరణ్ కెరీర్లోనే అత్యుత్తమ ప్రదర్శన అని ఆయన ధీమా వ్యక్తం చేశారు.
ఆస్కార్ విజేత ఏఆర్ రెహమాన్ సంగీతం అందిస్తుండటం ఈ సినిమాకు మరో ప్రధాన ఆకర్షణ. ఇప్పటికే విడుదలైన మ్యూజిక్ బిట్స్ పోస్టర్స్ సినిమా స్థాయిని పెంచేశాయి. ఈ రూరల్ ఎమోషనల్ డ్రామా జూన్ 4న ప్రపంచవ్యాప్తంగా విడుదల కానుంది. రామ్ చరణ్ తన బాడీ లాంగ్వేజ్, మేకోవర్ను ఈ సినిమా కోసం పూర్తిగా మార్చుకోవడంతో, బాక్సాఫీస్ వద్ద రికార్డుల వేట మొదలవ్వడం ఖాయమని సినీ విశ్లేషకులు భావిస్తున్నారు.