the Raja Saab : రీషూట్ల రూమర్స్‌కి చెక్..‘రాజాసాబ్’పై మేకర్స్ గ్యారెంటీ

పాన్ ఇండియా స్టార్ ప్రభాస్ హీరోగా, దర్శకుడు మారుతి తెరకెక్కిస్తున్న భారీ ఎంటర్‌టైనర్ ‘ది రాజాసాబ్’. ఫ్యామిలీ ఎంటర్‌టైన్‌మెంట్‌తో పాటు హారర్, కామెడీ టచ్ కలగలిపిన ఈ మూవీ 2026 సంక్రాంతి బరిలోకి దిగడానికి సిద్ధమవుతోంది. జనవరి 9న ఈ సినిమా థియేటర్లలో విడుదల కానుందని మేకర్స్ ఇప్పటికే ప్రకటించారు. కానీ ఇటీవల సోషల్ మీడియాలో “రాజా సాబ్ షూటింగ్ పూర్తి కాలేదు, రీషూట్ జరుగుతున్నాయి” అంటూ ప్రచారంలోకి వచ్చిన వార్తలు అభిమానుల్లో కొంత గందరగోళాన్ని సృష్టించాయి. దీంతో, పండగ రిలీజ్ వాయిదా పడుతుందా అనే అనుమానాలు మొదలయ్యాయి. అయితే ఈ రూమర్స్‌ పై క్లారిటీ ఇస్తూ నిర్మాత ఎస్‌కెఎన్ ట్విట్టర్ (X) లో స్పష్టత ఇచ్చారు.

“పండగకు వస్తున్నాం… పండగ చేసుకుంటున్నాం!” అని సూటిగా ట్వీట్ చేశారు. దీంతో రాజాసాబ్ టీమ్‌లో ఎటువంటి రీషూట్ ఇష్యూలు లేవని, సినిమా ప్లాన్ ప్రకారం సంక్రాంతికే థియేటర్లలోకి రానుందని తేలిపోయింది. ఇక ఈ సినిమాకు సంబంధించిన అప్‌డేట్స్‌కి అభిమానులు ఎప్పటికప్పుడు వెయిట్ చేస్తున్నారు. ఇప్పటికే విడుదలైన టీజర్‌, ట్రైలర్‌, పోస్టర్లు సోషల్ మీడియాలో ట్రెండింగ్‌లో నిలిచాయి. ప్రభాస్ స్టైల్‌, మారుతి ట్రీట్మెంట్‌, థమన్ బ్యాక్‌గ్రౌండ్ స్కోర్ ఈ కాంబినేషన్‌ పట్ల సినీ వర్గాల్లో మంచి బజ్ ఉంది. ఈ సినిమాలో నిధి అగర్వాల్, మాళవిక మోహనన్, రిద్ధి కుమార్ హీరోయిన్లుగా నటిస్తున్నారు. థమన్ సంగీతం అందిస్తుండగా, నిర్మాణం UV Creations, SKN బ్యానర్‌పై జరుగుతోంది. ప్రభాస్ గత చిత్రాలు భారీ స్థాయిలో బాక్సాఫీస్ కలెక్షన్లు సాధించిన నేపథ్యంలో, ‘ది రాజాసాబ్’ కూడా ఆ లెవెల్‌ అంచనాలు సెట్‌ చేసుకుంది. సంక్రాంతి రేసులో ఇది ప్రధాన ఆకర్షణగా నిలిచే అవకాశం ఉంది. ఇక ఇప్పుడు మేకర్స్ గ్యారెంటీ ఇవ్వడంతో అభిమానులు సోషల్ మీడియాలో హ్యాష్‌ట్యాగ్‌లు ట్రెండ్ చేస్తూ, “రాజాసాబ్ పండగ మూడ్ ఆన్”, “ప్రభాస్ ఇజ్ బ్యాక్” అంటూ సంబరాలు చేస్తున్నారు.