వెండితెరపై విలన్ల భరతం పట్టే ‘బాహుబలి’ ఇప్పుడు నిజజీవితంలో యువతను నాశనం చేస్తున్న అతిపెద్ద శత్రువుపై పోరుకు సిద్ధమయ్యారు! దేశ భవిష్యత్తును నిర్వీర్యం చేస్తున్న డ్రగ్స్ మహమ్మారిని తరిమికొట్టేందుకు కేంద్ర ప్రభుత్వం చేపట్టిన ‘నషా ముక్త్ భారత్’ (డ్రగ్స్ రహిత భారత్) ఉద్యమానికి పాన్ ఇండియా స్టార్ ప్రభాస్ తన సంపూర్ణ మద్దతు ప్రకటించారు. కేంద్ర బొగ్గు, గనుల శాఖ మంత్రి జి. కిషన్ రెడ్డి హైదరాబాద్లో ప్రభాస్ను మర్యాదపూర్వకంగా కలిసిన ఫొటోలు ఇప్పుడు సోషల్ మీడియాలో వైరల్ అవుతున్నాయి. ఈ భేటీలో భాగంగా “డ్రగ్స్ రహిత భారత్ కోసం మనమందరం గొంతు విప్పుదాం” అనే నినాదంతో నిర్వహిస్తున్న ‘హైదరాబాద్ వాక్స్ – నషా ముక్త్ భారత్’ యాత్రకు సంబంధించిన ప్రత్యేక టీ-షర్టులను వీరిద్దరూ కలిసి ఆవిష్కరించారు. ఈ ప్రతిష్టాత్మక కార్యక్రమానికి రావాల్సిందిగా ప్రభాస్ను కిషన్ రెడ్డి ప్రత్యేకంగా ఆహ్వానించారు.
డ్రగ్స్ రహిత సమాజ నిర్మాణం కేవలం ప్రభుత్వాల చర్యలతోనే సాధ్యం కాదని, ఇందులో సినీ ప్రముఖులు, సామాన్య ప్రజల భాగస్వామ్యం ఎంతో అవసరమని కిషన్ రెడ్డి ఈ సందర్భంగా స్పష్టం చేశారు. కోట్లాది మంది అభిమానులను, ముఖ్యంగా యువతను ప్రభావితం చేయగల అపారమైన శక్తి ప్రభాస్కు ఉందని ఆయన కొనియాడారు. రెబల్ స్టార్ లాంటి అగ్ర హీరో ఈ ఉద్యమంలో భాగమై ఒక్క పిలుపు ఇస్తే, యువతలో పెను మార్పు, గొప్ప చైతన్యం వస్తుందని కేంద్ర మంత్రి ఆశాభావం వ్యక్తం చేశారు. సామాజిక సేవలో ఎప్పుడూ ముందుండే ప్రభాస్, ఈ మహా యజ్ఞంలో పాలుపంచుకునేందుకు వెంటనే సానుకూలంగా స్పందించారు. దేశ భవిష్యత్తును కాపాడుకోవడానికి, ఆరోగ్యకరమైన సమాజాన్ని నిర్మించుకోవడానికి తన వంతు సహకారం అందిస్తానని భరోసా ఇచ్చారు. డ్రగ్స్ అనే పెను భూతాన్ని తరిమికొట్టేందుకు ఇప్పుడు ఏకంగా ‘బాహుబలి’ రంగంలోకి దిగడంతో, ‘నషా ముక్త్ భారత్’ ఉద్యమానికి సరికొత్త ఊపు రావడం ఖాయంగా కనిపిస్తోంది!

