Prabhas: ప్రముఖ నటుడు ప్రభాస్ శ్రీను తాజాగా ఎన్టీవీ పాడ్కాస్ట్లో తన సినీ ప్రయాణం, ప్రభాస్తో ఉన్న అనుబంధం గురించి ఆసక్తికర వ్యాఖ్యలు చేశారు. తనకు వచ్చిన గుర్తింపు మొత్తం ప్రతిభ కంటే అదృష్టం వల్లే వచ్చిందని, ముఖ్యంగా ప్రభాస్ పరిచయం తన జీవితాన్ని పూర్తిగా మార్చేసిందని అన్నారు. ఈ సందర్భంగా ఆయన మాట్లాడుతూ.. “నాకు వచ్చిన ఈ గుర్తింపు, వికీపీడియా పేజీ, అవకాశాలన్నీ నా టాలెంట్ వల్ల మాత్రమే కాదు. ఇది పూర్తిగా నా అదృష్టం. ప్రపంచంలో ప్రతి ఒక్కరిలోనూ టాలెంట్ ఉంటుంది. కానీ అందరికీ అలాంటి అవకాశాలు రావు. నా జీవితంలో ప్రభాస్ తగలడం నా పెద్ద లక్” అని చెప్పారు. తన రోజువారీ జీవితాన్ని వివరిస్తూ.. ఉదయం స్నేహితులతో కలిసి బైక్ రైడింగ్, బ్యాడ్మింటన్ ఆడటం, తర్వాత షూటింగ్లకు వెళ్లడం, అక్కడి నుంచి ప్రభాస్తో కలిసి ప్రయాణాలు చేయడం ఇది తన రోజూ వారి జీవితం అని అన్నారు. “ఒకవైపు సాధారణ జీవితం, మరోవైపు పాన్ ఇండియా స్టార్తో కలిసి ప్రపంచవ్యాప్తంగా ట్రావెల్ చేయడం.. ఈ రెండు అనుభవాలు ఒకేసారి నా జీవితంలో ఉండటం అదృష్టంగా భావిస్తాను” అని అన్నారు.
ప్రభాస్తో తన బంధం గురించి మాట్లాడుతూ.. “ఆయన చుట్టూ చాలా మంది ఉంటారు. కానీ ఎవరు ఆయనకు దగ్గరవుతారనేది చెప్పడం కష్టం. ప్రభాస్కు నిజాయితీ అంటే చాలా ఇష్టం. ఆయన చాలా తెలివైన వ్యక్తి. ప్రతి విషయాన్ని చాలా లోతుగా గమనిస్తారు. మా ఇద్దరి మధ్య బంధం ఎలా ఏర్పడిందో నేను కూడా చెప్పలేను. అది అనుభవించాల్సిందే” అని పేర్కొన్నారు. ప్రభాస్ను దేవుడితో పోల్చడంపై స్పందిస్తూ.. “నేను ఆయన ఫ్రెండా, మేనేజరా, ఇంకేదైనా బంధమా అనేది చెప్పలేను. నేను ఆయనతో ఉండటం, అవసరమైనప్పుడు సేవ చేయడం అంతే. నా జీవితంలో ఆయన స్థానం చాలా ప్రత్యేకం. అందుకే ఆయనను దేవుడిలా భావిస్తాను. అలాంటి బంధాన్ని మాటల్లో చెప్పడం కష్టం” అని ప్రభాస్ శ్రీను భావోద్వేగంగా చెప్పారు.
