లాస్య అండ్ మిధున క్రియేషన్స్ పతాకంపై చిరంజీవి పమిడి, శివ పమిడి, కిరణ్ కుమార్ నల్లూరి, స్రవంతి నంబూరి సంయుక్తంగా నిర్మిస్తున్న యూత్ఫుల్ ఎంటర్టైనర్ ‘మోడ్రన్ మిస్సమ్మ’. హర్ష నర్రా, తన్మయి ఖుషి హీరో హీరోయిన్లుగా నటిస్తున్న ఈ చిత్రానికి సాయిబాబా కథ, స్క్రీన్ప్లే సమకూర్చి దర్శకత్వం వహిస్తున్నారు. బుధవారం హైదరాబాద్లోని ప్రసాద్ ల్యాబ్స్లో ఈ చిత్రానికి సంబంధించిన ఫస్ట్ సింగిల్ను చిత్ర యూనిట్ ఘనంగా విడుదల చేసింది. స్టార్ మ్యూజిక్ డైరెక్టర్ గోపీ సుందర్ స్వరపరిచిన ఈ గీతానికి ప్రముఖ గేయ రచయిత కిట్టు విస్సాప్రగడ ఆకట్టుకునే సాహిత్యం అందించారు. హీరో సంప్రదాయ పంచెకట్టులో, హీరోయిన్ తన్మయి ట్రెడిషనల్ లుక్లో కనిపించే ఈ పాట నేటి తరం మహిళలకు బాగా కనెక్ట్ అయ్యేలా సాగింది.
ఈ సందర్భంగా హీరోయిన్ తన్మయి ఖుషి మాట్లాడుతూ.. “మన్మథుడు సినిమాలో ‘వద్దురా సోదరా’ పాట అప్పట్లో అబ్బాయిలకు ఎంతగా కనెక్ట్ అయిందో, ఇప్పుడు మా సినిమాలో ‘బెటర్ బీ ఏ మిస్సమ్మ’ పాట అమ్మాయిల మనసులకు అంతగా హత్తుకుంటుంది. అమ్మాయిల పాయింట్ ఆఫ్ వ్యూలో దర్శకుడు ఈ కథను చాలా చక్కగా రాశారు” అని తెలిపారు. హీరో హర్ష నర్రా మాట్లాడుతూ.. “మిస్సింగ్, రోటి కపడా రొమాన్స్ చిత్రాల తర్వాత నేను చేస్తున్న మూడో సినిమా ఇది. ఈ చిత్రాన్ని మేమంతా ఎంతో ఇష్టపడి, స్నేహితుల్లా కలిసి పనిచేశాం. గోపీ సుందర్ ఇచ్చిన సంగీతం, కిట్టు విస్సాప్రగడ రాసిన లిరిక్స్ అందరూ రిలేట్ చేసుకునేలా ఉంటాయి” అని ధీమా వ్యక్తం చేశారు. ఈ చిత్రంలో డాక్టర్ భద్రం, శివన్నారాయణ, సిజు ఏఆర్, ప్రమోదిని, హారిక, రాకేష్ రాచకొండ ఇతర ముఖ్య పాత్రలు పోషిస్తున్నారు. శేషు రాజ్ దడ్డాల, విజయ్ పిడప సినిమాటోగ్రఫీ అందిస్తుండగా, ఆదిత్య పాపిశెట్టి ఎడిటింగ్ బాధ్యతలు నిర్వహిస్తున్నారు. ఎగ్జిక్యూటివ్ ప్రొడ్యూసర్గా ఉప్పుతొల్ల బాబు (బాబీ) వ్యవహరిస్తున్నారు.