Megastar Chiranjeevi met Bhatti Vikramarka : టాలీవుడ్ మెగాస్టార్ చిరంజీవి తెలంగాణ ఉప ముఖ్యమంత్రి మల్లు భట్టి విక్రమార్క అధికారిక నివాసానికి వెళ్లి ఆయనను కలిశారు. తన సతీమణి సురేఖను వెంటపెట్టుకుని మెగాస్టార్ చిరంజీవి ప్రజా భవన్ లో ఉంటున్న భట్టి విక్రమార్క నివాసానికి వెళ్లారు.
భట్టి విక్రమార్క ఎన్నికల్లో గెలిచి ఉప ముఖ్యమంత్రి అయిన నేపథ్యంలో భట్టి విక్రమార్కకు మెగాస్టార్ చిరంజీవి శుభాకాంక్షలు తెలిపారు. ఇక ఎన్నికల అనంతరం పదవి చేపట్టిన భట్టి విక్రమార్కను మర్యాదపూర్వకంగా కలిసేందుకు తాను వచ్చానని ఈ సందర్భంగా మెగాస్టార్ చిరంజీవి వెల్లడించారు.
ఇక తన అధికారిక నివాసానికి విచ్చేసిన మెగాస్టార్ చిరంజీవిని శాలువాతో సత్కరించారు భట్టి విక్రమార్క. కొద్ది రోజుల క్రితం మెగాస్టార్ చిరంజీవి సతీ సమేతంగా ముఖ్యమంత్రి రేవంత్ రెడ్డిని సైతం కలిశారు. ముఖ్యమంత్రిగా ఎన్నికైన సందర్భంగా రేవంత్ రెడ్డికి శుభాకాంక్షలు కూడా తెలిపారు. ఇక ఈరోజు భట్టి విక్రమార్కను సతి సమేతంగా కలిసి ఆయన కుటుంబంతో సమయం గడిపారు.
డిప్యూటీ సీఎం భట్టి విక్రమార్క ని కాశ్మీర్ నుంచి తెప్పించిన శాలువాతో చిరంజీవి సత్కరించారు. చిరంజీవి దంపతులకు పుష్పగుచ్చం అందించి శాలువా కప్పి భట్టి విక్రమార్క గారు సత్కారం చేశారు. డిప్యూటీ సీఎం వెంట ఆయన సతీమణి మల్లు నందిని విక్రమార్క, కుమారుడు సూర్య విక్రమాదిత్య ఉన్నారు.
