Mahesh Babu Birthday 2026: మహేష్ బాబు పుట్టినరోజు స్పెషల్… ‘దూకుడు’ రీ-రిలీజ్‌తో అభిమానుల భారీ వేడుకలు!

Mahesh Babu Birthday 2026: సూపర్ స్టార్ మహేష్ బాబు పుట్టినరోజు అంటే అభిమానులకు అది ఒక ప్రత్యేక పండుగ. ప్రతి ఏడాది ఆగస్టు 9న జరిగే ఈ వేడుకలు ఈసారి మరింత ఘనంగా ఉండబోతున్నాయి. మహేష్ బాబు తన 51వ పుట్టినరోజును జరుపుకోనున్న నేపథ్యంలో హైదరాబాద్ నగరం ఇప్పటికే అభిమానుల సందడితో కళకళలాడుతోంది. ప్రత్యేక సినిమా ప్రదర్శనలు, కేక్ కటింగ్ కార్యక్రమాలు, ఫ్యాన్ మీట్‌లు, థీమ్ ఈవెంట్లతో నగరం మొత్తం వేడుకల మూడ్‌లోకి వెళ్లిపోయింది.

ఈసారి సంబరాలకు ప్రధాన ఆకర్షణగా మహేష్ బాబు బ్లాక్‌బస్టర్ చిత్రం ‘దూకుడు’ రీ రిలీజ్ కానుంది. అభిమానుల కోరిక మేరకు ఈ మూవీని మరోసారి థియేటర్లలో ప్రదర్శించనుండగా, నగరంలోని పలు థియేటర్లలో ప్రత్యేక షోలు ఏర్పాటు చేస్తున్నారు. ముఖ్యంగా మూసాపేట్‌లోని ఏషియన్ లక్ష్మీకళ సినీప్రైడ్‌లో ఆగస్టు 9 ఉదయం 8 గంటలకు నిర్వహించే ఫ్యాన్ షో అత్యంత భారీగా జరగనుంది. ఈ కార్యక్రమానికి పెద్ద సంఖ్యలో అభిమానులు హాజరుకానున్నారు.

ఈ వేడుకలను మరింత ప్రత్యేకంగా మార్చేందుకు పలు ఏర్పాట్లు చేశారు అభిమానులు. థియేటర్‌లో కాగితాల వర్షం, మహేష్ బాబు ఫ్యాన్ ఎడిట్ల ప్రదర్శన, టపాసుల సందడి, లైవ్ బ్యాండ్ ప్రదర్శనలు, 51 కిలోల భారీ బర్త్‌డే కేక్ కటింగ్ వంటి కార్యక్రమాలు ప్లాన్ చేశారు. అభిమానులకు మరికొన్ని సర్‌ప్రైజ్ ఈవెంట్లు కూడా సిద్ధం చేసినట్లు తెలుస్తోంది.

అంతేకాదు, ఈసారి హైదరాబాద్ నైట్‌లైఫ్ కూడా మహేష్ బాబు పుట్టినరోజు వేడుకల్లో భాగమవుతోంది. ఆగస్టు 8 అర్ధరాత్రి ఖాజాగూడలోని ది పర్పుల్ హౌస్లో ఉన్న ఇన్సోమ్నియా క్లబ్‌లో మహేష్ బాబు బర్త్‌డే సెలబ్రేషన్ ప్రత్యేకంగా నిర్వహించనున్నారు. ఈ వేడుకలో మహేష్ బాబు సినిమాల పాటలతో ప్లేలిస్ట్, థీమ్ డెకరేషన్, ఫోటో బూత్, డ్యాన్స్ ఫ్లోర్, అర్ధరాత్రి కేక్ కటింగ్ వంటి కార్యక్రమాలు ఉండనున్నాయి.

మహేష్ బాబు పుట్టినరోజు సందర్భంగా అభిమానులు ప్రతి సంవత్సరం సామాజిక సేవా కార్యక్రమాలు కూడా నిర్వహించడం ఆనవాయితీగా మారింది. రక్తదాన శిబిరాలు, అన్నదాన కార్యక్రమాలు, సేవా కార్యక్రమాలతో పాటు సోషల్ మీడియాలో భారీ స్థాయిలో ట్రెండ్స్ సృష్టించడం కూడా అభిమానుల ప్రత్యేకత. ఈసారి ‘దూకుడు’ రీ రిలీజ్‌తో పాటు నగరవ్యాప్తంగా ఫ్యాన్ ఈవెంట్లు జరగనున్న నేపథ్యంలో సంబరాలు గతం కంటే మరింత భారీగా ఉండనున్నాయని అభిమానులు చెబుతున్నారు.

ఇక సినిమాల విషయానికి వస్తే, మహేష్ బాబు ప్రస్తుతం దర్శకధీరుడు ఎస్.ఎస్. రాజమౌళి తెరకెక్కిస్తున్న ప్రతిష్టాత్మక యాక్షన్ అడ్వెంచర్ మూవీ ‘వారణాసి’ షూటింగ్‌లో బిజీగా ఉన్నారు. ప్రియాంక చోప్రా జోనాస్, పృథ్వీరాజ్ సుకుమారన్ కీలక పాత్రల్లో నటిస్తున్న ఈ చిత్రం భారతీయ సినీ పరిశ్రమలో అత్యంత ఆసక్తిగా ఎదురుచూస్తున్న ప్రాజెక్టులలో ఒకటిగా నిలిచింది. ఈ నేపథ్యంలో పుట్టినరోజు సందర్భంగా ఈ సినిమాకు సంబంధించిన ఎలాంటి సర్‌ప్రైజ్ వస్తుందా అనే ఆసక్తి కూడా అభిమానుల్లో నెలకొంది.