Lal Singh Chadda Trailer: అమ్మ చెప్పింది.. లైఫ్ అంటే పానీ పూరీ లాంటిదని

Lal Singh Chadda: బాలీవుడ్ మిస్టర్ పర్ఫెక్ట్ అమీర్ ఖాన్, కరీనా కపూర్ జంటగా అద్వైత్ చందన్ దర్శకత్వంలో తెరకెక్కిన చిత్రం లాల్ సింగ్ చద్దా. ఈ చిత్రంతో అక్కినేని నాగ చైతన్య బాలీవుడ్ ఎంట్రీ ఇస్తున్నాడు. అమీర్ ఖాన్ నిర్మాణంలో తెరకెక్కిన ఈ సినిమా తెలుగులో లాల్ సింగ్ చడ్డా అనే పేరుతో రిలీజ్ కానుంది. ఈ సినిమాకు తెలుగులో చిరంజీవి సమర్పకుడిగా వ్యవహరిస్తున్నారు. ఇప్పటికే ఈ చిత్రం నుంచి రిలీజైన పోస్టర్ ప్రేక్షకులను విశేషంగా ఆకట్టుకున్నాయి. ఇక తాజాగా ఈ సినిమా తెలుగు ట్రైలర్ ను చిరంజీవి రిలీజ్ చేశారు. ట్రైలర్ ఆద్యంతం ఆకట్టుకొంటుంది. “అమ్మ చెప్తూ ఉండేది.. మనందరి తలరాత ముందే రాసి ఉంటుందని, రాసినట్లే జరుగుతోందని.. అసలు నాకు తెలియనిది ఏంటంటే ఎవరు రాశారు.. ఎంత రాశారు.. ఎందుకు రాశారో తెలియదు” అని అమీర్ వాయిస్ తో ఈ ట్రైలర్ ప్రారంభం అయ్యింది. చిన్నతనంలో నడవలేని లాల్ అనే కుర్రాడు తల్లి ఇచ్చిన దైర్యంతో రన్నర్ గా, మేజర్ గా మారతాడు. బుద్ధి మాంద్యం ఉన్న లాల్ జీవితంలో జరిగిన పరిణామాలు ఏంటి..? అతనికి పరిచయమైన స్నేహితులు ఎవరు..? జీవితంలో తన తల్లి చెప్పిన మాటలు నిజమయ్యాయా..? అనేది సినిమా కథగా తెలుస్తోంది.

చిరంజీవి చెప్పినట్లే సినిమా ఎంతో ఎమోషనల్ గా ఉండనున్నట్లు ట్రైలర్ ను బట్టి తెలుస్తోంది. చిన్నతనం నుంచి నడవలేని ఒక కుర్రాడిగా, బుద్ధి మాంద్యం ఉన్న యువకుడిగా అమీర్ నటన అద్భుతంగా ఉందని చెప్పాలి. కానీ, ధైర్యంతో అతడు సైన్యంలో చేరడం, అవార్డును కూడా గెలుచుకోవడం చూపించి మనిషి అనుకుంటే ఏదైనా సాధించగలడు అని రుజువు చేయగలడు అనే సారాంశాన్ని అందిస్తున్నట్లు కనిపిస్తోంది. లాల్ భార్యగా కరీనా, స్నేహితుడిగా నాగ చైతన్య కనిపించారు. ఇక చివర్లో “అమ్మ ఎప్పుడూ చెప్తూ ఉండేది.. లైఫ్ అంటే పాణి పూరీ లాంటిదని.. కడుపు నిండినట్లు ఉంటుంది కానీ మనసు మాత్రం నిండదని” అని అమీర్ ఎంతో అమాయకంగా చెప్పడం సినిమాకు హైలైట్ గా నిలిచింది. ప్రస్తుతం ఈ ట్రైలర్ అభిమానులను ఆకట్టుకొంటుంది. మరి ఈ సినిమా ఎలాంటి విజయాన్ని అందుకుంటుందో చూడాలి.