Jr NTR: మ్యాన్ ఆఫ్ మాసెస్ జూనియర్ ఎన్టీఆర్ సినీ రంగంలో మరో కీలక అడుగు వేశారు. ఇప్పటివరకు హీరోగా వరుస సక్సెస్లతో దూసుకెళ్తున్న తారక్.. తాజాగా తన సొంత ప్రొడక్షన్ హౌస్ను ప్రారంభించినట్లు సమాచారం. ‘NTRTAIN’ పేరుతో ఈ నిర్మాణ సంస్థను ఏర్పాటు చేసినట్లు జోరుగా వార్తలు ప్రచారం అవుతున్నాయి. NTR + ENTERTAIN = NTRTAIN అని జూనియర్ ఎన్టీఆర్ తన ప్రొడక్షన్ హౌస్కు పేరు పెట్టినట్లు చెబుతున్నారు. ఎన్టీఆర్ పేరులోని ‘NTR’తో పాటు ఎంటర్టైన్మెంట్ను కలిపి ‘NTRTAIN’ అనే పేరును ఖరారు చేసినట్లు తెలుస్తోంది. సినిమా, వినోదం అనే రెండు అంశాలను ప్రతిబింబించేలా ఈ పేరును డిజైన్ చేసినట్లు సమాచారం. తన పేరుతో పాటు సినిమాపై ఉన్న అభిరుచిని కూడా ఈ బ్రాండ్ ద్వారా చాటేలా తారక్ ఈ పేరును ఎంచుకున్నట్లు తెలుస్తోంది.
ఈ నిర్మాణ సంస్థకు జూనియర్ ఎన్టీఆర్తో పాటు ఆయన సతీమణి ప్రణతి డైరెక్టర్లుగా వ్యవహరించనున్నట్లు సమాచారం. ఇప్పటికే హీరోగా పాన్ ఇండియా స్థాయిలో ప్రత్యేక గుర్తింపు తెచ్చుకున్న ఎన్టీఆర్.. ఇక నిర్మాతగానూ తనదైన ముద్ర వేయడానికి సిద్ధమవుతున్నారనే చర్చ ఇప్పుడు ఇండస్ట్రీలో మొదలైంది. ‘NTRTAIN’ ద్వారా ఎలాంటి సినిమాలను నిర్మించబోతున్నారు? కేవలం ఎన్టీఆర్ నటించే చిత్రాలనే నిర్మిస్తారా? లేక కొత్త కథలు, కొత్త దర్శకులు, యువ ప్రతిభను ప్రోత్సహించేలా సినిమాలు తెరకెక్కిస్తారా అనే ఆసక్తి అభిమానుల్లో నెలకొంది. అయితే నిర్మాణ సంస్థకు సంబంధించిన పూర్తి వివరాలు, తొలి ప్రాజెక్ట్ ఎప్పుడు ప్రారంభమవుతుంది? అనే విషయాలపై ఇంకా అధికారిక ప్రకటన రావాల్సి ఉంది. ప్రస్తుతం ఎన్టీఆర్ వరుస భారీ ప్రాజెక్టులతో బిజీగా ఉన్నారు. ఒకవైపు స్టార్ హీరోగా సినిమాలు చేస్తూనే.. మరోవైపు నిర్మాణ రంగంలోకి అడుగుపెట్టడం ఆసక్తికరంగా మారింది.