Irumudi Effect : అయ్యప్ప దీక్షలో గణపయ్య.. తలపై స్వయంగా ‘ఇరుముడి’ పెడుతున్న శివుడు!

వినాయక చవితి పండుగ అనగానే మనకు ముందుగా గుర్తొచ్చేది విభిన్న రూపాల్లో కొలువుదీరే ఆ విఘ్నేశ్వరుడే. ఏటా ఏదో ఒక కొత్త థీమ్‌తో మండపాలను ముస్తాబు చేయడం, దానికి తగ్గట్టుగా క్రియేటివ్ విగ్రహాలను ప్రతిష్టించడం భక్తులకు ఆనవాయితీగా వస్తోంది. అయితే, ఈసారి నెట్టింట ఒక ప్రత్యేకమైన వినాయకుడి వీడియో తీవ్ర సంచలనంగా మారింది. ఈ వీడియోలోని విగ్రహం చూస్తే ఎవరికైనా భక్తితో చేతులు వాటంతట అవే జోడిస్తాయి. ఆ సంచలన విగ్రహమే ‘ఇరుముడి గణేశ’. సాధారణంగా గణపతిని మనం రకరకాల అవతారాల్లో చూస్తుంటాం. సినిమా హీరోల దగ్గరి నుంచి దేవుళ్ల వరకూ ప్రతి రూపంలోనూ బొజ్జ గణపయ్యను మలుస్తుంటారు కళాకారులు. కానీ, ఈ వీడియోలో ఏకంగా సాక్షాత్తూ ఆ వినాయకుడు అయ్యప్ప దీక్ష తీసుకున్నట్లుగా అద్భుతంగా తీర్చిదిద్దారు. నల్లటి వస్త్రాలు ధరించి, మెడలో మాల వేసుకుని పరమ భక్తితో కూర్చున్న గణపయ్య తలపై.. స్వయంగా ఆయన తండ్రి పరమశివుడు ‘ఇరుముడి’ పెడుతున్న దృశ్యం ప్రతి ఒక్కరినీ కట్టిపడేస్తోంది. పక్కనే కొడుకును ఆప్యాయంగా చూస్తున్న పార్వతీదేవి ప్రతిమ ఈ దృశ్యానికి మరింత జీవం పోసింది.

స్వామివారు నల్లటి దుస్తులు, మెడలో పవిత్రమైన మాల ధరించి తలపై ఇరుముడితో అచ్చం శబరిమల వెళ్లే అయ్యప్ప స్వామి భక్తుడిలా దర్శనమిస్తున్నాడు. పార్వతీపరమేశ్వరులు ఇరువురూ కలిసి తమ కుమారుడిని శబరిమల యాత్రకు సాగనంపుతున్నట్లుగా ఉన్న ఈ విజువల్ భక్తులకు కనువిందు చేస్తోంది. వినాయకుడి వాహనమైన మూషికం (ఎలుక) కూడా నల్లటి పట్టు పంచె కట్టుకుని, మెడలో రుద్రాక్ష మాల వేసుకుని, రెండు చేతులు జోడించి స్వామి సేవలో తరించడం ఈ వీడియోలో మరో అద్భుతమైన హైలైట్.  సోషల్ మీడియా ద్వారా వెలుగులోకి వచ్చిన ఈ అద్భుతమైన ప్రతిమ ఇప్పుడు ఇంటర్నెట్‌లో సెన్సేషన్‌గా మారింది. వీడియో బ్యాక్‌గ్రౌండ్‌లో ప్లే అవుతున్న ‘అయ్యప్ప.. అయ్యప్ప’ అనే భక్తిగీతం చూసేవారికి గూస్‌బంప్స్ తెప్పిస్తోంది. ఈ వినూత్నమైన, భక్తిభావంతో కూడిన ‘ఇరుముడి గణేశుడి’ రూపం నెటిజన్ల హృదయాలను కొల్లగొడుతోంది.  ఇటీవల ఇరుముడి పేరుతో రవితేజ హీరోగా ఒక సినిమా రాగా, ఆ సినిమా బ్లాక్ బస్టర్ హిట్ అయింది.