Tollywood : సింగిల్ థియేటర్స్ మూత పడడానికి స్టార్ హీరోలే కారణమా?

సింగిల్ థియేటర్స్ మూత పడిపోవడానికి స్టార్ హీరోలే కారణం అంటున్నారు ట్రేడ్ వర్గాల వారు. థియేటర్స్‌లో ఆక్యుపెన్సీ పడిపోయిందంటే తప్పంతా పెద్ద హీరోలదే. పెద్ద హీరో ఏడాదికోసారి కనిపించినా చాలు, ఏడాది మొత్తం థియేటర్స్ కలకళలాడిపోతాయి. అదిగో ఇదిగో అంటూ ఊరిస్తారే కానీ, అనుకున్న టైమ్‌కు వెళ్లే సినిమాలు మొదలు కాదు, పూర్తి కాదు. ‘కెరీర్ లో బిగ్గెస్ట్ బడ్జెట్ మూవీ’, ‘హై టెక్నికల్ మేకింగ్’ అంటూ రెండు మూడేళ్లు గడిపేస్తున్నారు. దీంతో చాలా మంది స్టార్స్ సినిమాలు రెండు మూడేళ్లకు ఒకసారి రిలీజ్ అవుతున్నాయి. ఎక్కువ టైమ్ తీసుకొని, ఎక్కువ కాన్సంట్రేషన్ చేస్తేనే సినిమాలు హిట్ అవుతాయన్న మూఢ నమ్మకంతో పెద్ద హీరోలు ఉన్నారు.

కథలో దమ్ముంటే, మేకింగ్‌తో ఆకట్టుకుంటే ఐదారు నెలల్లో తీసిన సినిమాలు కూడా భారీ లాభాలు తీసుకొస్తాయి. క్రేజీ స్టార్స్ ఏడాదికి రెండు సినిమాలతో వస్తే సినిమా ఇండస్ట్రీ కలకళలాడుతుందని నిర్మాతలు చెబుతున్నా, వీళ్ళ వైఖరి మాత్రం మారడం లేదు. క్యాలెండర్‌లో సంవత్సరాలు గడిచిపోతున్నా బన్నీ మాత్రం స్లో మోషన్‌ను వీడటం లేదు. ‘పుష్ప’ వచ్చిన మూడేళ్లకు ‘పుష్ప 2’ తో వచ్చాడు. ‘పుష్ప 2’ 2024 డిసెంబర్‌లో విడుదల కాగా, ప్రస్తుతం అట్లీ దర్శకత్వంలో నటిస్తున్న ‘రాకా’ 2026 లో రావడం లేదు. ఈ లెక్కన 2025 తో పాటు 2026 ను కూడా మిస్ చేసుకున్నట్లే.

ఎన్టీఆర్ కూడా ఈ ఏడాది కనిపించడు. ఆయన తొలి హిందీ సినిమా ‘వార్ 2’ 2025 ఆగస్టులో రిలీజ్ అయింది. స్ట్రెయిట్ తెలుగు మూవీ రిలీజ్ అయి రెండేళ్లు అవుతుంది. 2024 సెప్టెంబర్‌లో ‘దేవర’ రిలీజ్ కాగా, ఏడాది నుంచి ‘డ్రాగన్’ షూటింగ్ లో ఉన్నాడు. ఈ ఏడాదే రిలీజ్ కావలసిన ‘డ్రాగన్’ షూటింగ్ ఆలస్యమై 2027 జూన్ 11న థియేటర్స్ లోకి వస్తుంది. ఇలా తారక్ ఈ ఏడాది కనిపించడు. అలా హీరోలు అందరూ లేటుగా సినిమాలు చేస్తుంటే ఆ ఎఫెక్ట్ థియేటర్ల మీద పడుతోంది అని చెప్పక తప్పదు.