Ranveer Singh: కెరీర్ పీక్స్‌లో ఉండగానే షాక్.. ‘ధురంధర్’ హీరోపై బ్యాన్.. అసలు మ్యాటర్ ఇదే!

Ranveer Singh: బాలీవుడ్ క్రేజీ ప్రాజెక్ట్ ‘డాన్ 3’ చుట్టూ నడుస్తున్న వివాదం చిలికి చిలికి గాలివానగా మారింది. ఈ సినిమా నుంచి అకస్మాత్తుగా తప్పుకున్నాడనే కారణంతో బాలీవుడ్ అగ్ర కథానాయకుడు రణ్‌వీర్ సింగ్‌పై ‘ఫెడరేషన్ ఆఫ్ వెస్ట్రన్ ఇండియా సినీ ఎంప్లాయీస్’ (FWICE) సోమవారం సంచలన నిర్ణయం తీసుకుంది. ఆయనకు ఇకపై పరిశ్రమకు చెందిన ఎవరూ సహకరించవద్దంటూ ‘నాన్-కోఆపరేషన్’ (Non-cooperation) ఆదేశాలను జారీ చేస్తూ ఇండస్ట్రీ నుంచి నిషేధించింది.

రూ.40 కోట్ల నష్టం.. ఫర్హాన్ అక్తర్ ఫిర్యాదు!
దర్శక నిర్మాత ఫర్హాన్ అక్తర్ – రితేష్ సిధ్వానీల నిర్మాణ సంస్థ ‘ఎక్సెల్ ఎంటర్‌టైన్‌మెంట్’ ‘డాన్ 3’ ప్రాజెక్ట్ కోసం భారీగా ఖర్చు చేసింది. అయితే షూటింగ్ స్టార్ట్ కావడానికి కేవలం మూడు వారాల ముందే రణ్‌వీర్ సింగ్ ఈ ప్రాజెక్ట్ నుంచి తప్పుకున్నాడని, దీనివల్ల ప్రీ-ప్రొడక్షన్ రూపంలో తమకు దాదాపు రూ.40 కోట్ల భారీ నష్టం వాటిల్లిందని నిర్మాతలు గతంలోనే ఆరోపించారు. స్క్రిప్ట్ విషయంలో వచ్చిన విభేదాల వల్లే రణ్‌వీర్ ఈ సినిమా నుంచి తప్పుకున్నట్లు ప్రచారం జరిగింది. ఈ నేపథ్యంలో దర్శకుడు ఫర్హాన్ అక్తర్ ఫిర్యాదు మేరకు రంగంలోకి దిగిన FWICE.. రణ్‌వీర్ సింగ్‌కు వరుసగా మూడు సార్లు నోటీసులు పంపినప్పటికీ ఆయన వైపు నుంచి సరైన స్పందన రాలేదని పేర్కొంది. దీంతో ఇండస్ట్రీలోని ఏ విభాగానికి చెందిన కార్మికులు, సాంకేతిక నిపుణులు ఆయనతో కలిసి పని చేయకూడదని ఫెడరేషన్ చీఫ్ అడ్వైజర్ అశోక్ పండిట్ తాజాగా స్పష్టం చేశారు.

అమితాబ్ బచ్చన్, షారుఖ్ ఖాన్ వంటి దిగ్గజాలకు కెరీర్ మైల్‌స్టోన్‌గా నిలిచిన ‘డాన్’ ఫ్రాంచైజీలో మూడో భాగం కావడంతో దీనిపై భారీ అంచనాలు ఉన్నాయి. రణ్‌వీర్ తప్పుకున్న తర్వాత ఈ రోల్ కోసం హృతిక్ రోషన్‌ను సంప్రదించినట్లు వార్తలు వచ్చినప్పటికీ, ఆ నటుడి టీమ్ ఆ వార్తలను పూర్తిగా ఖండించింది. ప్రస్తుతం రణ్‌వీర్ సింగ్‌పై నిషేధం విధించడంతో ఆయన నటిస్తున్న ఇతర ప్రాజెక్టులపై కూడా దీని ప్రభావం పడే అవకాశం ఉందని చెబుతున్నారు. మరోవైపు ‘డాన్ 3’లో హీరోగా ఎవరు నటిస్తారనే సందిగ్ధత ప్రస్తుతం బాలీవుడ్‌లో నెలకొంది.