Police Complaint Song: వరలక్ష్మి-నవీన్ చంద్ర క్యూట్ ల‌వ్ సాంగ్.. యూత్‌కు ఆకట్టుకుంటున్న ప్రేమగీతం!

టాలెంటెడ్ నటి వరలక్ష్మి శరత్‌ కుమార్, టాలీవుడ్ యాక్టర్ నవీన్ చంద్ర ప్రధాన పాత్రల్లో నటిస్తున్న తాజా చిత్రం ‘పోలీస్ కంప్లైంట్’. సంజీవ్ మేగోటి దర్శకత్వంలో తెరకెక్కుతున్న ఈ సినిమా.. హారర్ ఎలిమెంట్స్, యాక్షన్ ఎంటర్టైనర్‌గా రూపొందింది. ఎంఎస్‌కే ప్రమిద శ్రీ ఫిలిమ్స్ బ్యానర్‌పై బాలకృష్ణ మహారాణా నిర్మించారు. ఇప్పటికే సెన్సార్ కార్యక్రమాలు పూర్తి చేసుకున్న ఈ మూవీ క్లీన్ సర్టిఫికెట్ పొందింది. త్వరలోనే పోలీస్ కంప్లైంట్ చిత్రాన్ని గ్రాండ్‌గా విడుదల చేసేందుకు సన్నాహాలు చేస్తున్నారు. ఈ నేపథ్యంలో సినిమా ఓ నుంచి క్యూట్ ల‌వ్ సాంగ్‌ను రిలీజ్ చేశారు.

వరలక్ష్మి–నవీన్ చంద్ర జంటపై చిత్రీకరించిన మెలోడియస్ సాంగ్ ‘ప్రేమ ఓ ప్రేమ’ను సీనియర్ జర్నలిస్ట్ ప్రభు విడుదల చేశారు. ఈ పాటను అన్విక ఆడియోస్ ద్వారా ఆవిష్కరించారు. ఈ ప్రేమ గీతానికి సుధాకర్ మారియో సంగీతం సమకూర్చారు. భవ్యశ్రీ, సాత్విక్ ఆలపించారు. ఈ పాట యూత్‌కు విపరీతంగా నచ్చుతుందని, ట్రెండింగ్‌లో నిలుస్తుందని, సూపర్ హిట్ లవ్ సాంగ్స్ జాబితాలో చోటు సంపాదిస్తుందని దర్శకుడు సంజీవ్ మేగోటి ధీమా వ్యక్తం చేశారు. ప్రేమ, భావోద్వేగాలు మేళవించిన ఈ గీతం చిత్రానికి ప్రత్యేక ఆకర్షణగా నిలుస్తుందని తెలిపారు.

‘పోలీస్ కంప్లైంట్’ చిత్రంలో యాక్షన్, కామెడీ, రొమాన్స్ అంశాలను మేళవిస్తూ ప్రేక్షకులకు పూర్తి వినోదాన్ని అందించేలా చిత్రాన్ని రూపొందించినట్టు చిత్రబృందం తెలిపింది. ఈ చిత్రంలో రాగిణి ద్వివేది, కృష్ణ సాయి, ఆదిత్య ఓం, రవిశంకర్, శ్రీనివాస్ రెడ్డి, సప్తగిరి, పృథ్వి, శరత్ లోహితశ్వ, జెమినీ సురేష్, దిల్ రమేష్ తదితరులు కీలక పాత్రల్లో నటిస్తున్నారు. దాదాపు 52 మంది సీనియర్ ఆర్టిస్టులతో తెరకెక్కిన ఈ చిత్రంలో ఎస్ఎన్ హరీష్ సినిమాటోగ్రఫీ ప్రత్యేక ఆకర్షణగా నిలుస్తుందని, డ్రాగన్ ప్రకాష్–రవితేజ రూపొందించిన ఫైట్స్ హైలైట్ అవుతాయని చిత్ర యూనిట్ వెల్లడించింది.