NBK : నందమూరి బాలకృష్ణ హీరోగా స్టార్ డైరెక్టర్ కొరటాల శివ డైరెక్షన్లో ఓ భారీ చిత్రం తెరకెక్కనున్నట్లు తెలిసిందే. ఇటీవలే ఈ సినిమా పూజా కార్యక్రమాలతో ఘనంగా ప్రారంభమైంది. తాజాగా ఈ క్రేజీ ప్రాజెక్ట్కు సంబంధించి మరో ఆసక్తికర వార్త ఒకటి సోషల్ మీడియాలో తెగ వైరల్ అవుతోంది. ఈ సినిమాలో హీరోయిన్ ఐశ్వర్య రాజేశ్ ఒక కీలక పాత్రలో నటించనున్నట్లు ఇండస్ట్రీ వర్గాల్లో జోరుగా ప్రచారం జరుగుతుంది. ఈ చిత్రంలో ఐశ్వర్య రాజేశ్ హీరోయిన్గా కాకుండా కథను మలుపు తిప్పే నెగిటివ్ షేడ్స్ ఉన్న పవర్ఫుల్ రోల్లో కనిపించనున్నట్లు తెలుస్తోంది.
ఆమె పాత్రకు కథలో మంచి ప్రాధాన్యం ఉండటంతో పాటు, బాలకృష్ణ పాత్రతో బలమైన సంఘర్షణ ఉండేలా దర్శకుడు కొరటాల శివ డిజైన్ చేసినట్లు ప్రచారం జరుగుతోంది. తెలుగు, తమిళ చిత్రాల్లో హీరోయిన్గా తనదైన గుర్తింపు సంపాదించుకున్న ఐశ్వర్య రాజేశ్, ఇప్పటివరకు చేయని సరికొత్త రోల్లో ఈ సినిమాలో కనిపించబోతున్నట్లు సమాచారం. ఈ సినిమాలో ఆమె నిజంగానే నెగిటివ్ షేడ్స్ ఉన్న పాత్రలో కనిపిస్తే, ఆమె కెరీర్లో మరో ప్రత్యేకమైన పాత్రగా ఇది నిలిచే అవకాశం ఉందని సినీ విశ్లేషకులు అభిప్రాయపడుతున్నారు. అయితే బాలకృష్ణ–కొరటాల శివ కాంబినేషన్లో తెరకెక్కనున్న ఈ సినిమాపై వస్తున్న ఈ వార్తలపై చిత్రబృందం నుంచి ఇప్పటివరకు ఎలాంటి అధికారిక ప్రకటన బయటికి రాలేదు.