Nani fans meet: 10 వేల సెల్ఫీలు.. 10 వేల మందికి విందు భోజనం.. ఫ్యాన్స్ కోసం నాని సెన్సేషన్!

నేచురల్ స్టార్ నాని క్రేజ్, ఆయన మాస్ స్టామినా ఏ రేంజ్ లో ఉందో చెప్పడానికి తాజాగా ఘటనే నిదర్శనం. ఆయన లేటెస్ట్ యాక్షన్ మాస్ ఎంటర్టైనర్ ‘ది ప్యారడైజ్’ విడుదలకు సిద్ధమవుతున్న వేళ, నాని తన అభిమానుల కోసం చేసిన పని ఇప్పుడు టాలీవుడ్ లో సంచలనంగా మారింది. కేవలం సినిమా ప్రమోషన్లకే పరిమితం కాకుండా.. తనను గుండెల్లో పెట్టుకున్న ఫ్యాన్స్ కోసం ఆయన పెట్టిన ఎఫర్ట్, చూపించిన ప్రేమ చూసి ఇండస్ట్రీ వర్గాలు సైతం అవాక్కవుతున్నాయి. ‘ది ప్యారడైజ్’ రిలీజ్ కు ముందు అభిమానులతో నేరుగా ముచ్చటించేందుకు, వారిలో ఉత్సాహం నింపేందుకు నాని ఓ భారీ ఫ్యాన్స్ మీట్ ను ప్లాన్ చేశారు. ఇందుకోసం హైదరాబాద్ లోని ప్రముఖ సారధి స్టూడియోస్ లో ఏకంగా ఒక ఫ్లోర్ మొత్తాన్ని బుక్ చేశారు. తమ అభిమాన హీరోను కలుసుకునేందుకు రెండు తెలుగు రాష్ట్రాల నుంచి వేలాది మంది అభిమానులు పోటెత్తారు. దీంతో సారధి స్టూడియోస్ వద్ద వందల మీటర్ల మేర భారీ క్యూ లైన్లు దర్శనమిచ్చాయి. ఆ జనసంద్రాన్ని చూసి అక్కడున్న వారంతా షాక్ అయ్యారు.

ఈ ఈవెంట్ లో అత్యంత సెన్సేషనల్ పాయింట్ ఏమిటంటే.. నాని చూపించిన ఓపిక! తనను కలవడానికి వచ్చిన ప్రతి ఒక్క అభిమానితో ఆయన ఎంతో ఆప్యాయంగా మాట్లాడారు. ఏమాత్రం విసుక్కోకుండా, అలసిపోకుండా గంటల తరబడి అలాగే నిలబడి.. తనను చూడటానికి వచ్చిన దాదాపు 10 వేల మందికి పైగా అభిమానులతో సెల్ఫీలు దిగుతూ నయా ట్రెండ్ సెట్ చేస్తున్నారు. ఒక స్టార్ హీరో తన ఫ్యాన్స్ కోసం ఇంత సమయం గడపడం బహుశా ఇటీవల కాలంలో ఇదే తొలిసారి కావచ్చు. కేవలం ఫోటోలు, పలకరింపులతోనే ఆగిపోలేదు నాని. దూరాభారాల నుంచి తనకోసం వ్యయప్రయాసలకోర్చి వచ్చిన ఏ ఒక్క అభిమానీ ఆకలితో వెళ్లకూడదని ఆయన గట్టిగా నిర్ణయించుకున్నారు. అందుకే ఈ ఫ్యాన్స్ మీట్ కు వచ్చిన 10 వేల మందికి పైగా అభిమానులకు స్వయంగా భారీ స్థాయిలో విందు భోజనాలు ఏర్పాటు చేయడం విశేషం. వచ్చిన ప్రతి ఒక్కరూ కడుపునిండా భోజనం చేసి, తమ హీరోతో ఫోటో దిగిన ఆనందంతో తిరుగుముఖం పడుతున్నారు.