NANI : డ్యామేజైన ఫ్యామిలీ ఇమేజ్ కోసం ట్రై చేస్తున్న నేచురల్ స్టార్

న్యాచురల్ స్టార్ నాని వరుసగా వైవిధ్యమైన కథలతో ప్రేక్షకుల ముందుకు వస్తూ టాలీవుడ్‌లో తనకంటూ ఒక ప్రత్యేకమైన గుర్తింపును సంపాదించుకున్నారు. అయితే ఇటీవల ఓకే చేసిన ప్రాజెక్టులు, ముఖ్యంగా దసరా, హిట్ 3, ది ప్యారడైజ్ వంటి సినిమాలు పూర్తి రా అండ్ రస్టిక్ లుక్‌తో రక్తపాతంతో కూడిన సినిమాలుగా వచ్చాయి. ఈ భారీ యాక్షన్ కథల వల్ల నానికి మొదటి నుంచి ఉన్న ‘ఫ్యామిలీ ఆడియన్స్’ ఆదరణ మరియు సాఫ్ట్ ఇమేజ్ కాస్త తగ్గిందని విమర్శలు, ట్రోలింగ్ సామాజిక మాధ్యమాల్లో వినిపిస్తున్నాయి.

ఈ నేపథ్యంలో తన క్లాస్ అండ్ ఫ్యామిలీ ఇమేజ్‌ను తిరిగి కాపాడుకోవడానికి నాని ప్లాన్ చేస్తున్నట్లు కనిపిస్తోంది. మాస్, వైలెంట్ సినిమాలే కాకుండా, కుటుంబ ప్రేక్షకులను అలరించే మంచి క్లాస్ చిత్రాలను పట్టాలెక్కించాలని ఆలోచిస్తున్నారు. ఇందులో భాగంగా ’96’ మరియు ఇటీవల ‘సత్యం సుందరం’ చిత్రాలతో హృదయాలను హత్తుకునే ఫీల్ గుడ్ సినిమాలను అందించిన తమిళ దర్శకుడు ప్రేమ్ కుమార్‌తో ఒక సినిమా చేయడానికి సిద్ధమవుతున్నారు. ఈ సినిమాను రెండేళ్ల పాటు లాగకుండా కేవలం ఆరు నెలల వ్యవధిలోనే శరవేగంగా పూర్తి చేసి విడుదల చేయాలని ప్రణాళిక రచిస్తున్నారు. దీంతో పాటు, నానితో గతంలో ‘నిన్ను కోరి’, ‘తుక్ జగదీష్’ వంటి చిత్రాలను తెరకెక్కించిన దర్శకుడు శివ నిర్వాణతో కూడా మరో సినిమా చేసే ఆలోచనలో ఉన్నట్లు సమాచారం. శివ నిర్వాణ ‘ఇరుముడి’తో బ్లాక్ బస్టర్ కొట్టాడు. దాంతో మరోసారి శివతో ఎమోషనల్ అండ్ ఫ్యామిలీ ఎంటర్‌టైనర్ చేయాలనీ చూస్తున్నాడట. ఈ విధంగా వరుసగా క్లాస్, ఫ్యామిలీ ఓరియెంటెడ్ సినిమాలను లైన్‌లో పెడుతూ నాని తన మాస్, క్లాస్ ఇమేజ్‌ల మధ్య సరైన సమతుల్యతను కాపాడుకునే ప్రయత్నం చేస్తున్నారు.