Nandi Awards: తెలుగు సినీ కళాకారులు, సాంకేతిక నిపుణులు ఏళ్ల తరబడి ఎదురుచూస్తున్న అత్యున్నత పురస్కారాలు ‘నంది అవార్డులు’. దాదాపు దశాబ్ద కాలంగా వెండితెర రారాజులైన నంది విగ్రహాలు ప్రభుత్వ లాకర్లకే పరిమితమయ్యాయి. ఎట్టకేలకు ఆంధ్రప్రదేశ్ కూటమి ప్రభుత్వం వీటికి మోక్షం కలిగిస్తూ కీలక నిర్ణయం తీసుకుంది. అయితే ఇందులో అందరి దృష్టినీ ఆకర్షిస్తున్న అసలు ట్విస్ట్ ఏంటంటే.. 2017 నుంచి 2024 వరకు పెండింగ్లో ఉన్న కాలానికి సంబంధించి ప్రభుత్వం తీసుకున్న సంచలన నిర్ణయమే. సాధారణంగా నంది అవార్డులంటే హీరో, హీరోయిన్, దర్శకుడు, విలన్, హాస్యనటుడు, సంగీతం, కెమెరా సహా పదుల సంఖ్యలో కేటగిరీలు ఉంటాయి. కానీ 2017 నుంచి 2024 వరకు ఎనిమిదేళ్ల గ్యాప్లో విడుదలైన సినిమాలకు ఈ కేటగిరీలన్నింటినీ పరిగణనలోకి తీసుకోవడం సాంకేతికంగా, ఆచరణాత్మకంగా అసాధ్యమని ప్రభుత్వం తేల్చిచెప్పింది. అందుకే ఆ మధ్యంతర సంవత్సరాలకు ఏటా కేవలం నాలుగు అవార్డులు (ఉత్తమ చిత్రం, ద్వితీయ ఉత్తమ చిత్రం, మరో రెండు ప్రత్యేక జ్యూరీ అవార్డులు) మాత్రమే ప్రదానం చేయనున్నట్లు ఏపీ ఫిల్మ్ డెవలప్మెంట్ కార్పొరేషన్ (APFDC) ఛైర్మన్ భరత్ భూషణ్ స్పష్టం చేశారు. దీంతో ఆ ఏడేళ్ల కాలంలో అద్భుత ప్రతిభ కనబరిచిన నటీనటులు, దర్శకులు, సాంకేతిక నిపుణులకు వ్యక్తిగత నందులు దక్కే అవకాశం లేకుండా పోయినట్లయింది. పరిశ్రమ వర్గాల్లో ప్రస్తుతం ఈ అంశమే హాట్ టాపిక్గా మారింది.
అదే సమయంలో 2012 నుంచి 2016 మధ్య కాలానికి సంబంధించి అప్పట్లో ప్రకటించి ఆగిపోయిన 288 సినీ, 51 జ్యూరీ అవార్డులతో పాటు టెలివిజన్ రంగానికి చెందిన 330 పురస్కారాలను బాకీ లేకుండా అందజేస్తామని సర్కార్ భరోసా ఇచ్చింది. ఇక 2025 నుంచి ఎలాంటి కోతలు లేకుండా ఎప్పటిలాగే అన్ని విభాగాల్లోనూ పూర్తిస్థాయి నంది అవార్డులు యథావిధిగా కొనసాగుతాయని తెలిపారు. తెలంగాణ ప్రభుత్వం ప్రకటించిన ‘గద్దర్ అవార్డుల’తో దీనికి ఎలాంటి ముడిపెట్టడం లేదని అధికార వర్గాలు స్పష్టం చేశాయి. అక్కడ సత్కారం పొందిన తెలుగు చిత్రాలు సైతం ఇక్కడ దరఖాస్తు చేసుకోవచ్చని, తెలుగు కళామతల్లికి ప్రాంతీయ భేదాలు లేవని తేల్చేశారు. అంతేకాకుండా, ఈసారి నగదు ప్రోత్సాహకాన్ని కూడా ప్రత్యేక జీవో ద్వారా పెంచబోతున్నట్లు తెలిపారు. సినిమా నంది అవార్డుల ప్రధానోత్సవం రాజధాని అమరావతి వేదికగా, టెలివిజన్ నంది అవార్డుల వేడుక ఆధ్యాత్మిక నగరి తిరుపతిలో జరగనుందని వెల్లడించారు.