YouTuber Nandu : నాకేం సంబంధం లేదు అంతా మా ఆయనే.. విచారణకి సహకరించని రమా నందన

వివాదాస్పద యూట్యూబర్ రమా నందన పోలీసుల విచారణలో ఉక్కిరిబిక్కిరి అయ్యారు. కన్సల్టెన్సీ ముసుగులో జరిగిన వ్యవహారాలపై పోలీసులు ఆమెను ఏకంగా మూడు గంటల పాటు సుదీర్ఘంగా ప్రశ్నించారు. అయితే, ఈ విచారణలో పోలీసులకు ఏమాత్రం సహకరించకుండా రమా నందన పొంతనలేని సమాధానాలు చెప్పడం తీవ్ర సంచలనంగా మారింది. కన్సల్టెన్సీకి సంబంధించిన లావాదేవీలు, ఇతర వ్యవహారాలన్నీ తన భర్త మధుకర్ మాత్రమే చూసుకుంటారని, వాటితో తనకు ఎలాంటి సంబంధం లేదని ఆమె పూర్తిగా నెపాన్ని భర్తపైకి నెట్టేసే ప్రయత్నం చేశారు. “నేను కేవలం యూట్యూబ్ వీడియోలు మాత్రమే చేస్తాను, మిగతా విషయాలు నాకు తెలియవు” అని విచారణలో బుకాయించారు.

అయితే, రమా నందన యూట్యూబ్ ఛానెల్‌లో పోస్ట్ చేసిన వీడియోల్లోని కంటెంట్, అందులో ఆమె చేసిన ప్రమోషన్ల గురించి పోలీసులు గట్టిగా నిలదీయడంతో ఆమె వద్ద సరైన సమాధానం కరువైంది. తాను స్వయంగా చెప్పిన మాటల గురించే పోలీసులు ప్రశ్నలు సంధించడంతో ఆమె నీళ్లు నమిలినట్లు తెలుస్తోంది. ఎంత ప్రశ్నించినా ఆమె నుంచి స్పష్టమైన వివరాలు రాకపోవడం, దర్యాప్తును తప్పుదోవ పట్టించేలా సమాధానాలు దాటవేస్తుండటంతో పోలీసులు సీరియస్ అయ్యారు. విచారణకు ఏమాత్రం సహకరించకపోవడంతో, ఈ నెల 16వ తేదీన తప్పనిసరిగా మరోసారి విచారణకు హాజరుకావాలని రమా నందనకు పోలీసులు నోటీసులు జారీ చేశారు. తదుపరి విచారణలో ఆమె భర్త మధుకర్ పాత్ర, ఆ వీడియోల వెనుక ఉన్న అసలు ఉద్దేశాలు మరింత బహిర్గతమయ్యే అవకాశం ఉంది.